Projek ngaga RTP tetap dipejalaika Projek nya endang udah bisi diungkupka belanja lalu kunteriktor ke diberi projek anang irau pasal pekara nya, ku Morshidi
KUCHING: Sekretari Perintah Nengeri Tan Sri Datuk Amar Mohd Morshidi Abdul Ghani ngenukuka kunteriktor ti ngaga projek Program Transformasyen Menua Pesisir (RTP) madahka agih belanja nya endang udah bisi lalu sida enda patut irau pasal pekara nya.
“Projek RTP nya ari baruh perintah nengeri lalu agih belanja endang udah. Nya alai, sesapa ke ngambi projek nya enda patut berasai irau ati. Kitai ngarapka sesapa ti be jalaika projek tu patut seruran nyendia asil kereja ti bekualiti ke pemaik rayat,” ku Morshidi madah ngagai The Borneo Post kemari.
Iya mega mantah berita selebubu ngapa ti madahka perintah nengeri nadai agi duit dikena mayar kunterikor ti udah diberi projek RTP nya ti dipunka niang Kepala Menteri Pehin Sri Adenan Satem.
“Patut nadai penemu ti madahka nadai duit dikena ngaga projek RTP nya laban projek nya deka majak dipejalaika lalu kami bisi agih belanja dikena mayar kunteriktor ti udah diberi projek,” tambah
Projek RTP nya ari baruh perintah nengeri lalu agih belanja endang udah. Nya alai, sesapa ke ngambi projek nya enda patut berasai irau ati. Kitai ngarapka sesapa ti be jalaika projek tu patut seruran nyendia asil kereja ti bekualiti ke pemaik rayat. Tan Sri Datuk Amar Mohd Morshidi Abdul Ghani Sekretari Perintah Nengeri
Morshidi.
Ungkup projek bepuluh billion Pan Borneo highway, Morshidi,ke mega chairman eksekutif komiti ngaga sereta ngemata projek, madahka nya projek perintah besai ti udah dikemendarka.
“Naka ke diatu, kami gaga ati enggau pemanah kereja kunteriktor, projek nya benung digaga lalu pemansang nya entara 10- 20 peratus tembu. Bisi sekeda nya mega dulu ari pelin. Kami ngarapka ulih ditembu baka ti diperambu nyerumba taun 2023,” ku iya.
Berebak enggau nya,Sapit Kepala Menteri ke Mega Menteri Pemansang Infrastruktur enggau Perengka Pengangkut Tan Sri Datuk Amar Dr James Jemut Masing madahka Perintah Besai ti betuaika Tun Dr Mahathir Mohamad patut ngakun projek besai nya ti beguna amat ngagai ke pemansang sosio-ekonomi Sarawak enggau Sabah.
“Kami pechaya iya ( Dr Mahathir) deka ngemajakka projek laban nya nyaup nyungkak pemansang sosioekonomi 2.8 milion rayat Sarawak,”ku iya.
Masing mega madah, chairman Pakatan Harapan Nengeri,Chong Chieng Jen udah ngenukuka Pakatan Harapan ti megai Perintah Besai deka majak mantu nengeri taja pan perintah nengeri udah pemutus mengkang nyadi penyakal.
“Tu enda tau enda ditampung laban kitai udah ditinggal pengelama 55 taun ari sukut pemansang infrastruktur,” ku Masing.