Raban IPGKTAR mujur nemuai seraya belajar sereta ngerembaika muzik asal ngagai Rome
MIRI: Ngarap ulih ngelakuka muzik etnik ari Sarawak ngagai dunya, tiga iku nembiak enggau pengajar ari Palan Pematih Pengajar Kampus Tun Abdul Razak ( IPGKTAR) udah nemuai seraya belajar ngagai Rome apin lama ke udah.
Tu peluang chukup manah ngagai sida mantaika main asal enggau pesaka asal menua tu ngagai mata dunya.
Nitih ku menijar Sarawak Ethnic Music Performance, Adibah Ismail, pejalai nya nyadi kereban ba pengawa nempa pelajar enggau pematih pengajar enggau penemu, pengelandik, ulah positif sereta gaya pengetan diri ti tinggi ditambah enggau penetap bala pengajar seriris enggau Prinsip Menua,Philosophi Pelajar Menua enggau Philosophi Pelajar Pengajar.
“Pejalai enggau pengawa merindang tu endang meri bala pelajar ari palan tu input ti manah amat. Kualiti enggau disiplin diiri rambau latih muzik deka nambahka nilai ba pengawa nempa bala pelajar enggau pengajar dudi hari enggau penempa gaya ulah ti nyulut amat.
“Pengelandik enggau peneleba diiri nengah kaul sida ba program ke bansa tu deka nambahka penemu sida, ti deka mantu pengelantang komuniti enggau menua,” ku Adibah madah ngagai The Borneo Post bedau lama udah.
Rambau pejalai nemuai nya, bala nembiak ulih mantaika penau enggau pengulih sida ngambika ulih dikunsi sereta dikelaku ngagai menua luar.
“Iya mega nyediaka sida enggau kenang chukup manis ngasaika peneleba merindang di menua bukai, seraya ngasuh sida rinduka jaku bukai, main asal enggau chara idup,” ku Adibah nambah.
Pejalai nya berengkah ari 22 ngagai 27 April mega ngemai pesereta ngambika merindang di Pesuruhjaya Tinggi Malaysia dalam begunan Rome sereta mega di Festival dell’Oriente.
“Pengawa merindang di Malaysian Embassy di Rome diatur beserimbai enggau hari bejualka pemakai tradisional Malaysia. Bemacham bansa pemakai Malaysia bisi dijual ny- engkaum nasi lemak, sate, rendang enggau kek.
“Pengawa richah agi enggau penatai temuai dipebasa Malaysian Ambassador to the Holy See, Vatican City Tan Sri Bernard Giluk Dompok sereta mega peranak Malaysia ke bukai ti diau sereta bekereja di Rome, Italy,” ku Adibah.
Ku Adibah nambah, dikearap nengah pejalai tu, sida deka ulih ngerembaika agi seni muzik etnik di menua luar, sereta mega nerenakka pengerindu enggau penau dalam muzik antara bala pelajar sida.
Pejalai nemuai belajar diketuaika Prinsipal IPGKTAR Hamsiah Abdullah Masni sereta disempulang Adibah, Abdul Latiff Poli, Andreas Alexander, Nursyahira Mohamad Narudin enggau Romario Ansam Rungah.
Iya disukung Pesuruhjaya Tinggi Malaysia di Rome, Italy enggau Dagang Temuai Malaysia.