Meri kelala sistem asil ke meransang ekonomi ngalahka empas defisit lebuh ngemunaska Chukai Barang enggau Servis
SUBANG JAYA: Perintah Malaysia meseti ngakun sekeda negeri ke dipegai penyakal sereta meri kelala sistem asil ke meransang ekonomi ngalahka empas defisit lebuh ngemunaska Chukai Barang enggau Servis (GST).
Pekara tu dipadah ulih Presiden Institut Jeffrey Cheah Asia Tenggara, Prof Woo Wing Thye, iya nya siku panelis ke bejaku ba forum bekait enggau “Keeping The Promise Reform” di Universiti Sunway, kena hari Satu tu tadi.
“Leka jaku nya mai reti, kitai enda tau enda bisi sistem asil ke ngelala tetiap buah sitak menua nyangka dipegai ulih parti ke enda sebaka, lalu jalai ngaturka pengawa ke pengabis manah, iya nya sadung kuasa ari atur perintah,” ku iya.
Taja pia, iya madah ke pengabis pedis ba sadung kuasa ari atur perintah, iya nya semua duit ke digumpul ulih Perintah Besai, sida iya ke mutuska ni bagi bengkah sitak menua ke patut diberi tauka ni bagi sitak menua ke enda ibuh diberi, ke endang ditemu sitak menua ke dipegai penyakal ke ngasaika empas pilih tu.
“Perintah Besai enda patut ngumpul kelalu mayuh duit tang ba renggat menua ke patut ngumpul sekeda ari wang turu nya,” ku iya madah, lalu nandu baru madahka penanggul ke bisi ba sitak menua nya, manah agi dikemutar ulih orang ari menua nya empu.
Iya nandu baru madahka Malaysia ada maya Perintah Bekurung alai maya nya Perintah nyatup munsuh sida iya begunaka pekuh ke berat - nya kebuah sida (Perintah) mambarka tiap pemutus ke digaga sida iya - ke enda ulih dikena ba gaya dunya baka kediatu.
Iya pechaya defisit ke ditapi ulih Perintah pengudah ngemunaska GST nyangka penanggul dalam timpuh ke pandak, enti parti ke megai menua diatu meri kelala sistem chukai pra-pemansang, iya nya ubah ke sama sejalai bepelasarka chara baru ke nyentuk agi ke ditemu dah mujur ba menua bukai.
“Berat endar pemisi pungkal kuasa polisi ke bepalan ba Perintah Besai disadung ngagai serata menua, dalam tetiap nengeri, ari iya semina bepalan di EPU Putrajaya,” ku iya.
Iya madah baka di China enggau USA, gabenor ke nyaga sitak menua enggau nengeri, besemekih nyadi orang ke pengabis nyulut niki langkar pemesai parti tauka menang pengawa bepilih tang bepelasarka merit.
Ku iya, Malaysia ulih minta universiti menua tu empu ngemansangka ekonomi menua, nengah meri wang turu ke diberi ngagai universiti kena ngemansangka teknologi ke ngipak gaya menua tu empu, ke mayuh digaga di USA.
Taja pia, pekara bansa tu nadai digaga di Malaysia, alai kepala menteri ba siti-siti sitak menua bepanggai ba wang turu sereta pemisi ari Perintah Besai, ke mutuska sapa ke patut diberi, tauka sapa ke enda ibuh.
“Enti nitih, Kepala Menteri nadai pemisi wang kena ngamatka pungkal kuasa ke manah, lalu pekara tu meseti berubah,” ku iya.
Iya nandu baru madahka Perintah ke betukar ari parti ke udah lama megai menua baka Barisan Nasional (BN) ke udah megai kuasa dalam pengelama lebih 60 taun, diatu Perintah nya bepindah ngagai Pakatan Harapan (PH), ukai dalih ngelaunka ubah di Malaysia.
Pemesai Malaysia baika nya PH tauka BN, ulih belajar bechuanka menua bukai, laban pengawa bansa tu kala nyadi di Mexico enggau Taiwan.
“Taja pan, tu keterubah endar nyadi ditu (di Malaysia) tang kuasa menua ke berubah kala udah nyadi ba endur bukai. Pelaba aku, mayuh pekara ulih digaga jampat sereta muntang digaga laban kitai udah nemu baka ni kitai ngaga pengawa nya,” ku iya.
Ambika chunto, iya madah Mexico’s Institutional Revolutionary Party (PRI) tetaipa kali menang pengawa bepilih presiden ari 1929 ngagai 1994, lalu baka nya mega enggau Kuomintang ( KMT), iya nya sebuah parti ke bepuluh taun megai Perintah sereta ke pengabis mayuh di Taiwan, alah ba pengawa bepilih dalam taun 2016 lalu ke pemungkal iya, dipegai ulih Parlimen.
“PRI di Mexico enggau KMT di Taiwan ngubah sida iya empu lalu udah nyua dipilih baru,” ku iya, lalu nandu baru madahka BN pan ulih mulaika diri nengah chara bejalaika pengawa Perintah ke manah sereta nyendiaka polisi ekonomi ke manah agi.
Forum nya nyadi palan ke kaban Pakatan Harapan, tukan pansik bejuraika penemu sida iya, alai pemerat ubah ba Perintah baru enda tau enda digaga dalam kandang seratus hari megai kuasa.
Taja pan, tu keterubah endar nyadi ditu (di Malaysia) tang kuasa menua ke berubah kala udah nyadi ba endur bukai. Pelaba aku, mayuh pekara ulih digaga jampat sereta muntang digaga laban kitai udah nemu baka ni kitai ngaga pengawa nya. Prof Woo Wing Thye Presiden Institut Jeffrey Cheah Asia Tenggara