Sepuluh NGO udah nerima ungkup belanja RM120,000 ari Petronas
KUCHING: Sepuluh Gerempung Ukai Dikuasa Ulih Perintah (NGO) beruntung endar lebuh nerima ungkup RM120,000.00 ari Petronas bedau lama tu tadi.
Ungkup nya sebagi ari RM10 juta wang turu ke diberi ulih Petronas kena mantu Perintah Menua Sarawak melanja program pengelantang pendiau mensia mayuh.
Entara penerima ke bulih geran aro Petronas nya, Society Kuching Urban Poor, Special Olympic Sarawak, Gerempung Indu Methodist, Serakup Gerempung Indu China Pelilih Menua Kuching & Samarahan, Palan Pengerai Komuniti 1
Divisyen Kem Penrissen, Gerempung Cerebral Palsy ke Pelilih Menua Kuching enggau Samarahan, Serakup Gerempung Chung Hua Sarawak, Gerempung Ten Pin
Bowling Para Sarawak, Gerempung Orang Buta Malaysia Menua Sarawak, enggau Gerempung Kuching Spinal Injuries.
Geran nya diberi ulih Kepala Menteri Datuk Patinggi Abang Johari Tun Openg ba siti atur pengawa ti digaga di MJC Batu Kawah bedau lama tu tadi.
“Petronas sigi bebendar iya mantu Perintah Menua Sarawak ngemanahka agi pengelantang pendiau komuniti di Sarawak,” ku Shamsur Taha, Menijer Besai PETRONAS, Opis sitak menua Sarawak.
Kelimpah ari meri geran ngagai NGO, Petronas mega deka ngungkupka urung RM460 juta kena ngaga projek Tanggungpengawa Rama Korporat di Sarawak, lalu ungkup tu ila deka diberi ngagai MRSM Bintulu, Asrama Harian Menua Pesisir di Paloh, Projek Eko-Marin Petronas-Sarawak Forestry di Miri, Palan Petrosains Playsmart di Kuching sereta 4 buah palan komuniti bukai.