Fikon ke penudi endar di Bintulu taun tu sebedau ditukar nama nyadi Fikon S’wak
BINTULU: Fikon tauka ‘ Final Concert’ sebuah palan belagu ke ngelatih bala penyanyi baru nyadi pemerindang ke versatile.
Orang ke mungkal Fikon, Tuah Jili madah bala penyereta dalam Fikon ukai semina diajar bakani chara belagu ke betul, tang sida iya mega diajar pemungkal penemu sereta pengelandik baka dalam seni lakun sereta tanda.
“Kami deka meda produk kami tu versatile, lalu ukai semina landik belagu aja, tang ke pemujur industri,” ku iya lalu nandu baru madahka enda mayuh ke udah nempa nama dalam pengawa ‘glamer’ baka tu.
Tuah nandu baru madahka Fikon 7 ke baru udah tembu digaga hari Minggu tu tadi, nyadi ke penudi iya endar digaga di Bintulu laban taun baru tu ila, Fikon tu deka ditukar nama ngagai Fikon Sarawak lalu deka bepalan di Kuching.
“Fikon tu palan ke sida ke baru iya kala belagu, ke deka masuk industri pemerindang ( belagu) lalu sekeda ari finalis ari edisi ke dulu agi udah nyadi ‘recording artistes’ lalu sekeda nya mega udah ngelancharka album ‘single’ sida iya,” ku Tuah ti mega nyadi Menijer Zon Utara Opis Kaunsil Seni Sarawak (MSS), alai MSS tu baruh pegai Opis Menteri Dagang Temuai, Seni, Adat Pesaka, Nembiak, Lumba enggau Main Sarawak (MOTACYS).
Iya nandu baru madahka finalis Fikon 7 udah bejalaika latih sereta kelas praktikal enggau teori dalam kandang sebulan, ari pemun audition nya digaga, nyendiaka penyereta masuk ngagai renggat ke penudi iya endar.
Ku iya, semua finalis tu udah dilatih lalu diiring embing ukai semina nyadi penyanyi aja tang tukang pemerindang ke bekualiti tinggi, ke ulih belagu tauka merindang ba mua orang mayuh.
“Ke rikod kami, semua penemu pasal gaya merindang ba atas panggau ari pengelandik penyereta nya empu, laban kami semina mantu sida iya matau kreativiti sida iya.
“Ba industri seni bansa tu, sigi nadai alai penyereta lembau tauka ngumbai semua penemu nya datai ngagai sida iya bansa nya aja. Sida iya meseti suah nyakap sida iya empu ngaga pengawa ke enda kala digaga sida iya ngelama tu,” ku Tuah madah ngagai pengarang berita ‘The Bor- neo Post’.
Ari nadai penemu dalam pengawa pemerindang ngagai nyadi orang ke bepengelandik ke ulih ngasuh sida sebilik temegah ati ke pemujur ke udah dijapai sida, nyadi peransang ke Tuah ngemutarka Fikon ari taun 2012.
Tuah madah dalam Fikon, sida ke mujur dipilih enggau nyadi penyereta dalam Fikon diajar ukai semina paal penemu ke ngipak industri pemerindang tang ke batang, disiplin nyadi artis.
Iya madah enti nadai disiplin ke tinggi, orang nya enda ulih nyingkang jauh dalam industri tu.
Dalam kandang tujuh taun tu ke udah ngemutarka Fikon di Bintulu, Tuah madah, iya napi mayuh macham empas, pemagas ari tim iya empu kelebih agi Kumpulan Sri Budaya Bintulu mujur dipeda bisi asil lebuh iya dikelala ba renggat menua, enggau nama Fikon ditukar nyadi Fikon Sarawak.
“Enti nitihka ati, sigi sinu endar ngenang Fikon tu laban nadai agi Fikon di Bintulu tang taja pia, kami berasai temegah ati laban pemendar kami dalam berapa taun tu ke udah dikelala ulih opis menteri.
“Nukar nama Fikon ngagai Fikon Sarawak baka ke mimpi nyadi nyata, lalu aku deka majakka pengawa aku ngemutarka palan tu laban aku orang ke mungkal program tu,” ku iya.