Yayasan Sarawak tetap majakka pengawa mantu nembiak sekula di menua pesisir
BELAGA: Pengawa Nyerah Baucer Bantu Baju Sekula Yayasan Sarawak ngagai nembiak sekula di sitak Belaga ke taun 2018, siti pengawa ke berat endar lalu ukai semina ngagai apai indai tang ngagai nembiak sekula.
“Nya alai, Perintah Menua sereta pemesai menua sigi betatika pengelantang pendiau anak mit ke besekula, lalu enggai ninga tauka meda bala nembiak ke enda ulih nyambung pelajar sida iya ketegal nadai duit kena bebelika baju sekula tauka bup sereta perengka guna kena sekula bukai,” ku Menteri Muda Bekal Ai Sarawak, Datuk Liwan Lagang.
Iya madah munyi nya lebuh bejaku ba atur pengawa Nyerah Baucer Bantu Baju Sekula Yayaan Sarawak Taun 2018 ngagai nembiak sekula di 15 buah sekula di sitak Belaga, di Rumah Rehat Belaga, bedau lama tu tadi.
Iya nandu baru madahka Perintah di renggat Menua sigi betatika pengelantang pendiau anak mit ke besekula lalu enggai meda sida iya enda ulih nurun ke sekula ketegal suntuk.
“Perintah udah mutuska deka nikika penyampau baucer ari RM100 ngagai RM200 ke tetiap iku nembiak sekula ke patut nerima baucer tu nitihka atur ti udah ditetapka, dalam penyampau RM4 juta ke nembiak Primeri Satu, enggau Pom Satu,” ku iya.
Liwan mega ngasuh semua vendor ke bisi enggau ngeluarka bekal baju dalam kuantiti sereta kualiti, ngaga pengawa sida iya nganjung bekal nya ngipak rega baucar RM200.
“Enti ulih apai indai patut meresa baju sekula anak sida iya ngambika ngipak enggau penyampau baucer ke diberi nya,” ku iya.
Ku iya, Perintah Menua betatika pemansang pelajar nembiak menua tu taja pan pekara pelajar ba kuasa Perintah besai.
“Ketegal pemerat nya, pelajar nyadi pemungkal ngagai pemansang modal mensia ke bekualiti. Nya kebuah Kepala Menteri, Datuk Patinggi Abang Johari Tun Openg ngaga portfolio Menteri Pelajar di menua tu ke mandangka pengamat sereta pemerat Perintah Menua Sarawak ke betatika pelajar di menua tu,” ku iya.
Iya nandu baru madahka, pelajar bepun ari diri sebilik. Timpuh nembiak besekula enda lama, lalu mayuh ari jam anak kitai begaul enggau apai indai, komuniti bukai, ke ulih ngempung penegap pelajar ke diajar di sekula.
“Enti nitih, apai indai ke nyadi sukat bala anak kitai di ruang bilik kitai. Nya alai, pengawa tauka japai anak kitai ukai semina diserah ngagai sekula aja tang bela dibantu ulih apai indai,” ku iya.
Kelimpah ari nya, Liwan mega madahka Perintah bisi nyendiaka sekula latih ke manah kena negapka, ngelatih bala nembiak kitai ke bisi pengelandik jari lalu nadai pengerindu besekula formal lalu tau bulih kelala sereta bulih pengawa ke menyana.
“Palan servis kitai udah mai bala anak kitai ke baru udah nembuka peresa sekula Perintah, SPM ke serata palan baka UNIMAS, UiTM Samarahan, IPT sereta palan pelajar tinggi bukai, dalam kandang 4 taun tu ke udah.
“Ba sida ke lalu bedau bulih endur nyambung pelajar sida iya, kita pan tau ngelawa Politeknik, tauka palan latih swasta enggau Perintah baka ke ba Centre for Technical Excellent (CENTEX) enggau palan latih bukai.
“Mayuh macham latih bisi disediaka Perintah Menua nengah CENTEX, sekula latih bepelasarka latih pengelandik baka wielding, bepelasarka minyak enggau gis baka scaffolding, rigging, slinging enggau mayuh macham kus bukai,” ku iya.