Grace menggi gelar Kumang Gawai Dayak Mukah 2018

MUKAH: Grace Mithchellynna Jineus dipadu megai gelar Kumang Gawai Dayak Mukah maya Pengerami Mantar Gawai Dayak Renggat Sitak Mukah 2018 ditu, empai lama.

Enggau nya iya mai pulai perais mata duit RM700, selampai, tropi, jumpang enggau hamper.

Penuduk lumur dua diempu Gwendoline Tyner Nyangun lalu mai perais mata duit RM500, tropi enggau hamper.

Suzzy Elvynia Nyanau maya tu ngempu perais mata duit RM300, tropi enggau hamper ba penuduk lumur tiga.

Tujuh iku pemekit ke bukai iya nya Eleanor Calista Angie, Fresca Ferra Ricky, Bermas Julin, Emelsha Jeburie Abol, Asnesa Asing, Bovina Badong Singa enggau Paulina bela nerima perais sagu ati.

Ba pekit betabuh ti diatur berebak enggau pekit nya, gelar champian diempu Team Temesu Krew.

Tim tu mai perais mata duit RM350.

Tim Bulu Landak enggau tim Jarum Besi Guni Baja ti bulih penuduk lumur dua enggau tiga mai perais RM250 enggau RM150.

Perais pekit kumang enggau betabuh disua temuai dipebasa iya nya pengari Kaban Kunsil Nengeri (ADUN) Telian Jay Keram enggau pemantu nggai ADUN Balingian Che Ghazali Arbi.

Pengerami tu bela digulu chairman komiti Gawai Dayak Sitak Mukah 2018 ti mega Chairman Gerempung Dayak Sarawak (SDNU) Mukah Francis Atan, Ketuai Polis Mukah DSP Jimmy Panyau, Penghulu Iju Tutong, Penghulu Uking, Penghulu Empaling Beji sereta lebih 500 iku temuai ke bukai.