Isu bekaul bekal ai beresi, servis pengerai, pengelantang pendiau deka diberi pemerat diputar enggau lengkas
MIRI: Kaban Parlimen (MP) Miri, Dr Michael Teo besemaya deka bejalaika servis meruan agi kelebih agi mutarka isu bekaul enggau peminta rayat.
Ku Teo mayuh pekara ti patut dipejalai sereta diberi pemerat ngambika diputar berenggat ari perintah Pakatan Harapan (PH).
Isu menua tu baka bekal ai beresi, servis pengerai, setinggan enggau ke bukai diberi pemerat diputar enggau lengkas.
“Ngelama tu kitai udah nurun gawa mendingka sebana penusah ti ditapi peranak Miri lalu ari pemisi perintah PH ke diatu, kitai deka mutarka penanggul tu,” ku iya.
Teo mansutka jaku nya rambau Pengerami ‘Makan Malam Penghargaan’ beserimbai enggau pemujur iya rambau Pengawa Bepilih Besai Ke-14 (PRU14).
Teo mega deka ngangkatka opis iya nyadi palan servis dikena ngempung sebana mensia mayuh.
“Aku minta semua peranak Miri ti napi penanggul datai ngelawa kami ngambika kitai ulih berandau lalu mutarka penanggul nya begulai,” ku iya nerang.
Teo sekali agi madahka pengandal diri ke alai menua deka nyulut agi di baruh pegai PH lalu tentu mega rintai menteri kabinet PH deka gawa negika nasit rayat.
“Aku mega meri terima kasih ngagai semua pengundi di Miri ti udah ngelempaika pengandal sida ngagai aku ngarika sida di renggat Parlimen,” ku iya.
Sama bisi datai Ketuai Indu Parti Keadilan Rakyat (PKR) Nengeri, Voon Shiak Ni, ex-chalun PKR Sibuti, Jemat Panjang, bala bakih media sereta jentera PRU14 PKR Miri.
Ngelama tu kitai udah nurun gawa mendingka sebana penusah ti ditapi peranak Miri lalu ari pemisi perintah PH ke diatu, kitai deka mutarka penanggul tu. Dr Michael Teo MP Miri