Perintah nengeri patut ngungkupka agih belanja ba sitak pegai PH
MIRI: Perintah nengeri patut berunding meri agih belanja ungkup pemansang ngagai sebarang kandang menua pegai Pakatan harapan (PH) di Sarawak.
Berindik ari penerang dibantaika Menteri Dalam Menua Tan Sri Muhyiddin Yassin kena Hari Minggu ke alai bantu meseti agi diberi taja sida di kandang menua penyakal, pia ku Kaban Kunsil Nengeri (ADUN) Pujut Dr Ting Tiong Choon madah Sarawak patut bejalaika pengawa ke sama.
Ku iya, lebuh Barisan Nasional ( BN) agi megai perintah, bala sida (penyakal) nadai nerima agih belanja ari perintah nengeri, tang diatu PH udah megai ulu, polisi patut diubah.
“Ambika chunto dalam taun 2017, aku nemu tetiap iku ADUN BN nerima RM5 juta seraya kami ti nyadi penyakal lebuh nya nadai nerima.
“Nya alai, kenyau ari PH deka meri agih belanja ngagai kandang menua dipegai penyakal, aku ngansak Kepala Menteri Datuk Patinggi Abang Johari Tun Openg ngambi bejalaika polisi ke sama meri agih belanja ngagai semua kandang menua nadai ngira ideologi politik,” ku iya pengudah pejalai ngabas gaya jalai di Jalai Piasau ditu, Hari Satu tadi.
Dr Ting ari Parti Tindakan Demokratik (DAP) nyemetak madahka agih belanja deka dikena ungkup pemansang infrastruktur enggau peranak ditu.
Belalauka gaya jalai ti diabas iya di Jalai Piasau, Dr Ting madahka Miri City Council (MCC) meseti nentuka pengawa ngaga penyikap jalai di mengeri besai nitihka standard ti ditetap.
“Aku enggai betenah tang aku udah nerima sebana ari sida ti betengahka jalai ke alai sekeda jalai enda nitihka standard ti patut diperati lalu dalih kualiti jalai enda manah ketegal enda chukup belanja endang enda ulih diterima.
“Jalai tu semina berengkah ditengah kurang ari dua bulan ke udah lalu kaunsil melanja RM880,000 ungkup jalai sepanjai 750 meter lalu udah ngenusahka sida ti betengahka jalai kenyau ari iya berengkah ditengah, laban ti betingkah lalu tu bisi ngebung beberapa hari ke udah. Baka ti ulih dipeda kitai, belakin nipis amat lalu aku ngansak opis injinir ba kaunsil beratika pekara tu laban jalai baru patut enda baka tu lalu tu chukup ngeruga pengelikun,” ku iya nandu.
Iya ngelala raban bekaul beratika pekara tu laban pengelikun sida ti betengahka jalai alun endang chukup dikemerat.