Rayat mantah sebarang parti komponen BN diterima masuk PH

MIRI: Gerempung oganisasyen mensia mayuh ditu mantah enti sebarang parti Barisan Nasional ( BN) Sarawak kelebih agi Parti Pesaka Bumiputera Bersatu (PBB) nyemilik Pakatan Harapan (PH) di renggat Perintah Besai.

Chairman SAVE Rivers Peter Kallang madah, BN alah rambau Pengawa Bepilih Besai Ke-14 (PRU14) tu tadi laban pengundi enda puas ati enggau gaya tauka perintah BN lalu ngarapka ulih ngubah parti nya pulaika pemaik rayat.

Ku Peter enti sema PH nerima BN, tu ngujungka pengawa ditegika sida begulai enggau bala pengundi ti nyukung PH ngelama tu lebu ngapa.

“Ulah PH nukangka pintu ngagai parti komponen BN tu deka ngelemika pengawa ditegika sida lalu enda ulih diterima rayat ti ngundi PH. Aku pechaya rayat ti ngundi BN pen ngenggaika parti tama PH.

“Nya alai, pengawa ngemai tama sebarang parti BN ke dalam PH patut diseliah ba sebarang chara pen. Enti BN tama PH, nama ubah ti ulih diperagam?” ku iya ba siti penerang berita kemari.

Penerang nya nimbal pekara bekaul berita ngerimbas pending sekalika PBB deka nerima pinta Menteri Besai, Tun Dr Mahathir Mohamad ngambi meleka ari BN lalu nyemilik Pakatan Harapan Besai.

Sebedau tu, Dr Mahathir udah betemu enggau Tuai Pemegai Menua ( TYT) Tun Pehin Sri Abdul Taib Mahmud berandauka pinta gempung nya.

Ku Peter taja penyereta BN Sarawak semina jaku tempa aja, PH Sarawak endang enda deka nyukung lalu ngemendarka pekara nya nyadi.

“BN patut bejalaika pangku pengawa sida nyadi penyakal dikena nentuka pegai perintah di sebela, lurus enggau adil. Malaysia enggau Sarawak begunaka perintah ti ulih ngatur pengawa, lurus lalu ngemeratka rayat,” ku iya.

Kelimpah ari SAVE Rivers, bela mantah penama BN Sarawak dalam PH Besai iya nya Jaringan Orang Asal SeMalaysia (JOAS), Serakup Dayak Iban Sarawak (SADIA), Serakup Dayak Sarawak (PEDAS), Jaringan Tanah Hak Adat Bangsa Asal Sarawak (TAHABAS), Borneo Resources Institute Malaysia (BRIMAS), Gerakan Anak Sarawak (GASAK), Sarawak Indigenous Lawyers Alliance (SILA), Serakup Raban Bansa Tering Miri (PMTM), Building Indigenous Initiatives and Heritage ( BIIH) enggau Rise of Sarawak Efforts (R.O.S.E).