Wong: CMS udah kelalu lama diberi kunterik pemanah jalai alun
KUCHING: Kaban Kunsil Nengeri( ADUN) Padungan Wong King Wei minta perintah nengeri ngeluarka tinda tebuka ba atur milih kompeni ke ngintu pemanah jalai alun ungkup jalai ke dipasuk ba kategori diintu perintah nengeri.
Ku iya, kompeni ke diatu iya nya CMS udah kelalu lama diberi kunterik nya.
Iya pechaya mayuh kompeni bukai di nengeri tu ulih nangkup tenggungpengawa ke sama.
“Kompeni CMS Road Maintenance Sdn Bhd udah bulih kunterik nya pengelama 15 taun iya nya kenyau 2003.
“Aku udah nanya sentang pekara tu ngagai perintah nengeri ba aum DUN ba taun ke udah ke alai aku minta atur milih kompeni ke diberi kuntrek nya udah tu digaga nengah tinda tebuka.
“Timpuh kunterik 15 taun CMS deka tembu ba taun 2018 tu lalu tu maya ke ngena endur perintah nengeri ngadu pengawa nya,’ku iya ba aum pengarang berita di Indu Opis DAP ditu, kemari.
Iya nambah, pemanjai jalai ke dipasuk ba kategori jalai nengeri iya nya 4,973 km lalu tebal agi dalam kandang mengeri.
Nitihka rikut taun 2012 ku Wong nambah, perintah mayar RM2,298.68 sekilometer sebulan ungkup kereja ngintu pemanah jalai nya.
“Reti nya ungkup timpuh sebulan aja, perintah mayar CMS RM11 juta lalu penyampau tu chukup besai.
‘Kunterik ke besai tu patut enda diberi ngagai sebuah kompeni aja lalu timpuh kunterik patut urung 3 ngagai 5 taun,’ku iya.
Wong mega madah rambau aum DUN ke udah, iya merambu kuntrek nya dibagi ngagai 10 bengkah kandang endur lalu diberi ngagai mayuh bengkah kompeni
Kebuah pia ku iya ngambika mayuh agi kuntriktor ulih bulih pemaik ari kereja nya lalu ngerembaika kompeni sida.
“Baka Perintah Besai, atur ngintu pemanah jalai alun dibagi ngagai tiga bengkah kandang endur iya nya tunga Utara, Tengah enggau Selatan,’Ku Wong nambah.
Iya mega minta perintah nengeri nitihka chara Perintah Pakatan Harapan diatu ke alai semua kunterik diberi nengah tinda tebuka.