Sida bemainka isu ripot polis bekaul kes ke diripot 22 November 2016 dikena ngamahka nama Baru
KUCHING: Chairman Parti Keadilan Rakyat ( PKR) Sarawak Baru Bian ngasaika Parti Bansa Dayak Sarawak Baru (PBDSB) iya nya siti parti ke enda profesional.
Kaban Parlimen Selangau nya madah ulah PBDSB ti bemainka isu ripot polis bekaul kes ke diripot kena 22 November 2016 nengah siku orang ke benama Nickodemus Singgai endang sengaja dikena ngamahka nama iya.
“Aku deka nyemetak madah orang ke ngaga ripot polis nya nyau enggai kiruh neruska kes nya lalu nadai sebarang dakwa tauka penyalah dikenuku ngagai aku enggau (Kaban Kunsil Nengeri Batu Lintang) See Chee How.
“Tang, PBDSB bemainka isu tu ngerembaika ripot polis kes nya ba laman media rama enggau nadai nerangka utai ti amat, tu nunjukka sida nadai profresional lalu sengaja deka ngelabuhka ‘reputasyen’ aku,” ku iya nengah sebengkah penerang ditu kemari.
Baru madah munyi nya lebuh nimbal sentang penerang Ketuai Pemadah PBDSB Bobby William bekaul pinta parti nya ngagai Pakatan Harapan (PH) ngambi bejalaika tapis dalam nyiri kaban Parlimen PH Sarawak nyadi menteri ba perintah besai ditu kemari.
“Aku udah macha penerang berita ti dipansutka Bobby lalu aku pechaya penerang nya udah dikerembai ba laman facebook PBDSB, Reject Baram Dam Project enggau sekeda raban gerup whatapp nyengkaum Ruai Intellectual Dayak enggau Pemansang Dayak.
“Taja dalam penerang berita nya nadai nyebut nama aku tang iya terang dituju ngagai aku,” ku iya seraya ngasaika ulah PBDSB nya siti ulah ‘orang takut’.
Ngelansa mimit pasal ripot nya, Baru ke mega ADUN Ba’ Kelalan madah, iya enggau See udah bejalaika atur ngagai orang ti ngeripot lalu luyar iya laban nabur petenah.
“Pekara tu benung ba kort, nyadi aku enda ibuh nerang enggau panjai.
“Laban pekara tu udah nyadi perati mensia mayuh, aku deka nyuaka surat tuntut nuju Bobby, Cobbold John, Rapelson Richard Hamit enggau orang bukai ti ngerembaika petenah tu,” ku tandu iya.
Kemari, Bobby nengah sebengkah penerang berita iya ngansak PH bejalaika tapis dalam nyiri Kaban Parlimen ari Sarawak dalam rintai kabinet.
Iya madah pekara tu berindik ari bisi siti ripot polis bekaul kes Tanah Hak Adat ( NCR) ngagai luyar ke dikearap lalu nyadi siku ari luyar PKR ke mega siku pengari rayat Parlimen enggau Kunsil Nengeri.
“Tapis patut digaga dikena nentuka pengari rayat ke dichiri nyadi Menteri Perintah Besai nyengala beresi enggau nadai skandal ari kes tanah tu tauka makai suap.
“Pengari rayat nya patut ngenukuka diri enggau meresi nama iya sebedau nyadi Menteri Perintah.
“Nyadi pengawa nyiri iya dalam kabinet meseti ditangguh dulu nyentuk kes teputar tauka nganti iya ngenukuka diri empu, “ku iya.
Bobby madah tu endang dikena meransang ulah amanah, bersih, adil enggau lurus megai perintah.
“Perintah Baru patut nithka chara baru. Enda patut nitih chara lama. Cara BN?” ku iya.
Aku deka nyemetak madah orang ke ngaga ripot polis nya nyau enggai kiruh neruska kes nya lalu nadai sebarang dakwa tauka penyalah dikenuku ngagai aku enggau (Kaban Kunsil Nengeri Batu Lintang) See Chee How. Baru Bian Chairman PKR Sarawak