Belanja ke diberi nya ulih dikena mantu ADUN ke ari baruh kuasa parlimen
KUCHING: Kaban Parlimen Sri Aman Datuk Masir Kujat ngelalu pemutus Kepala Menteri Datuk Patinggi Abang Johari Tun Openg meri agih belanja ngagai 19 iku MP Barisan Nasional (BN) Sarawak.
Ku iya, agih belanja ari perintah nengeri nya ulih dikena mantu Kaban Kunsil Nengeri (ADUN) ke ari baruh kuasa parlimen.
“Siti pemutus ke ngena udah digaga Kepala Menteri ke alai agih belanja tu ulih mantu raban MP BN nengeri.
“Kitai (MP) ke nyadi penyakal ba Perintah Besai sigi enda ngandalka agih belanja ari Putra Jaya,” ku iya lebuh dikerandau kemari.
Masir ke nyadi Sapit Menteri Dalam Menua maya Perintah BN netapka agih belanja ulih dikena ngemujur pekara pemansang kelimpah nyaup raban ADUN ti deka nempuh pengawa bepilih nengeri dalam timpuh dua setengah taun ti deka datai.
Siti pemutus ke ngena udah digaga Kepala Menteri ke alai agih belanja tu ulih mantu raban MP BN nengeri. Datuk Masir Kujat Kaban Parlimen Sri Aman
Ngenang kaul ke sama, MP Serian Dato Sri Richard Riot madah agih belanja nya deka nentuka rayat seruran ngasaika pemaik enggau pengelantang kelebih agi ba pekara pemansang.
Ku iya, agih belanja nya ulih dikena ngemujur projek pemansang ungkup rayat ke udah meri sukung ngagai BN ba pengawa bepilih ke udah.
“Sitak parlimen di menua pesisir nyengkaum Serian mungkur kandang endur ke besai, ketegal nya kitai begunaka agih belanja ungkup pemaik rayat,” ku Riot.
Ex- Menteri Penguasa Pemayuh Pengereja Pengawa nya enggai bejurai sentang atur Perintah Baru Pakatan Harapan (PH) tang iya muji pengeran perintah nengeri ti deka neruska projek besai.
Ensanus, Abang Johari madah 19 iku MP BN deka nerima ungkup belanja pemansang Program Transformasyen Menua Pesisir (RTP), Projek Mit Menua Pesisir ( MRP) enggau ngemanah palan servis ari Perintah Nengeri.
Abang Johari netapka penyampau nya sebaka enggau penyampau ke diterima Kaban Kunsil Nengeri (ADUN) BN.
Agih belanja nya mungkur penyampau RM5 juta ungkup RTP, RM1 juta ungkup MRP enggau RM250,000 dikena ngemanah palan servis.