Bantu ninting bulan ngagai raban seranta, kurang benasit patut dipajakka

KUCHING: Bantu ninting bulan raban seranta enggau kurang benasit manah di nengeri tu entara program ke pemadu beguna ke patut dipajakka Perintah Pakatan Harapan (PH).

Menteri Pengintu Pengelantang Pendiau, Pengelantang Raban Bansa, Orang Indu, Runag Bilik enggau Pemansang Nembiak Mit, Dato Sri Fatimah Abdullah madahka bantu tu amat beguna dikena mantu raban tu.

“Bepelasarka rikod ke penudi kitai iya nya bulan Mac 2018, Sarawak ngerikod bisi 56,000 lebih penerima bantu ninting bulan ari Opis Pengintu Pengelantang Raban Bansa (JKM).

“Penyampau tu enda statik, lalu bantu ninting bulan tu siti chara kitai mantu raban tu ari idup ke umang,” ku iya.

Iya mansutka pekara nya lebuh dikerandau raban pengarang berita pengudah ‘ Majlis Pembungkusan Sumbangsih Kuih Raya 2018’ di Dewan Kunsil Negeri (DUN) Lama ditu, kemari.

Bejaku baru Fatimah madah, kelimpah ari program bantu ninting bulan JKM, mayuh agi polisi bukai ti meri penguntung ngagai raban ke ditagit ke patut dipajakka sereta patut dikemeratka perintah.

Entara nya, program ungkup orang tuai, orang nyelai pendiau ( OKU), indai tunggal nyengkaum pengawa ngenegapka raban orang indu.

“Aku ngasaika program enggau polisi ti manah tu patut dipajakka laban nya tentu meri pemanah ngagai raban ke ditagit kitai.

“Bisi agi pekara bukai baka undang- undang ti nyaga hak orang indu enggau anak mit. Semua tu ba aku patut dipajakka sereta patut dikemeratka perintah,” ku iya.

Berebak enggau tu Fatimah mega meri puji ngagai perintah besai baru ti numbuhka kabinet enggau pengawa angkat sumpah ti ditimpuhka kena Hari Satu tu.

Ba renggat Sarawak ku iya, tetap enggau penemu iya nya deka nempa kerejasama enggau perintah besai enggau siti juluk iya nya dikena mantu rayat.

Iya ngarapka Sarawak deka bulih pengibuh ke patut ari perintah besai ngambika Sarawak terus meri penguntung ngagai raban ke ditagit sida.