Program SKSJ sigi dikelalu diatur ba menua pesisir
DALAT: Program Satu Komuniti Satu JPJ (SKSJ) di menua pesisir sigi dikelalu ngambi ngemuntangka agi pengawa ngulihka lisin deriba enda ibuh jauh pansut ari rumah ngulihka lisin nya.
Menteri Pnegelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madah, ambika chunto baka sitak Dalat, penyauh alai mensia mayuh ke diau dia, enti sida iya deka ngambi lisin deriba ke pengabis semak, iya nya ngagai Mukah.
“Atur program nya nyadi peminta ari mensia mayuh ke agi begunaka servis ari Opis Pengangkut Jalai ( JPJ) ke deka minta lisin kelas B2.
“Iya mega nyadi konsep kena ngurangka penyampau badi nengah ngelisinka mensia mayuh,” ku iya madah lebuh bejaku nutup Program SKSJ Pelilih Menua Dalat di Stadium Perpaduan Dalat ditu, apin lama ke udah.
Iya ti mega nyadi Kaban Kunsil Nengeri (ADUN) Dalat madah, bisi dipadah ngagai iya, penyampau penyereta ke bisi enggau program di sitak Dalat manggai dalam 1,471 orang iku mensia mayuh.
Nitihka statistik ku Fatimah, urung 70 peratus mensia mayuh ke diau dia bedau bisi Kisin Driba B2, kelebih agi bala nembiak ke berumur 21 taun ke atas.
“Redak baru nyadi orang ke tau dipadah mayuh ke enda belisin ke ngena kerita bala bakih tauka sida sebilik.
“Mayuh badi nyadi ke ngaitka pengguna jalai alun nyengkaum sida ke bejalaika atur kuasa bakal ketegal penyalah orang mayuh ke driba nya ke nadai ngembuan sebarang lisin,” ku iya.
Iya nandu baru madahka, urung 18,180 kes bebadi di jalai alun bisi di ripot di serata menua sepemanjai bulan Januari ngagai November 2017.
Statistik tu mandangka penyampau nya bisi udah turun 0.7 persin tauka 135 kes bebanding enggau timpuh ke sebaka dalam taun ke sama sebedau nya.
Ari penyampau nya, 345 kes bekait enggau bebadi mati, ke diperatika bisi kurang mimit 2.3 persin tauka lapan kes dibanding enggau taun sebedau nya.
Ba pengawa nya mega, Fatimah nyuaka perais ngagai penyereta SKSJ ke Pengabis Tuai di Sarawak, iay nya siku lelaki, Suhaili ke berumur 83 taun enggau siku indu, Sepiah ke berumur 79 taun.
Rikod penyereta ke pengabis tuai ke bisi enggau program SKSJ di Sarawak sebedau tu dalam 72 taun.