Pemutus perintah nengeri ngagih belanja ngagai 19 MP BN dipuji
MIRI: Agih belanja ninting taun ti diagihka perintah nengeri ngagai 19 iku Kaban Parlimen Barisan Nasional ( BN) diperati siti atur ti engkeman enggau komphensif.
Kaban Parlimen ( MP) Sibuti, Lukanisman Awang Sauni madahka agih belanja nya ulih dikena ngemansangka sitak menua dipegai BN.
“Agih belanja tu deka dikena MP nampung pejalai projek pemansang pulaika pengelantang rayat kelebih agi di menua pesisir,” ku iya ditu kemari.
Lukanisman madahka agih belanja nya mega nyata ngayanka nengeri Sarawak diatur enggau meruan sereta pengawa ngagihka belanja sebela.
“Udah tu kitai deka nampung pejalai projek ti meri pemaik enggau nitihka peminta rayat kelebih agi di sitak Sibuti,” ku iya.
Kenu ku iya, Parlimen Sibuti bisi dua sitak Bepilih Kunsil Nengeri (DUN) Lambir enggau Bekenu mega udah nerima agih belanja ti sebaka.
Tu mungkur Projek Mit Pemansang Menua Pesisir ( MRP) penyampau RM1 juta, Projek Transformasyen Menua Pesisir (RTP) sepenyampau RM5 juta sereta RM250,000 ungkup Palan Servis (PK) Parlimen.
“Aku deka ngatur sekeda renggat randau enggau DUN dikena ngelala projek ti beguna amat ngagai rayat,” ku iya nerang.
Berebak enggau nya, Lukanisman deka matau pekara ti nyadi kemaya hari ba pengawa numbuhka perintah besai ti baru.
“Kitai deka nentuka semua hak enggau agih belanja ungkup Sarawak diagih sama adil baka ti disemaya sida rambau pengawa bepilih tu tadi,” ku iya.