Pengerami Pemakai Menua deka diatur di Balai St Jerome, 26 Mei

KUCHING: Pengerami Pemakai Menua 2018 deka diatur nyerumba pengawa bejadika Serakup Dayak Iban Sarawak (SADIA) Pampang Krian di Balai St Jerome, Kaki Wong, Krian kena 26 Mei tu.

Pengerami tu diatur begulai enam gempung ukai dikuasa perintah ( NGO) Dayak iya nya Saratok Update, SADIA-Krian, Serakup Dayak Sarawak (PEDAS), Dayak Gempuru ( DG), Dayak Think-Tank Group ( DTTG) Kuching enggau Ruai Cyber Dayak.

Temuai dipebasa bisi dikangau datai maya atur pengerami tu ila iya nya Aktivis Rama, Nicholas Bawin.

S e k r e t a r i p e n g a t u r pengerami, Andrew Paul, nesau bala ke bisi pengelandik manduk lauk dikearap ulih ngelimpangka awak diri ngulu pekit manduk lauk ti disebut set menu pemakai menua, iya nya pemakai asal bansa Iban.

Dua bansa pemakai asal ti dibai ba pekit iya nya Jani Guring Iban enggau Daun Empasa/Jabang/Ubi Guring. Taja pia, enti nadai pemenang dipadu maya atur pekit manduk dua bansa pemakai nya, dia sida ti bepekit dipinta belaban baru manduk Kasam Ensabi.

“Enti apin ga bisi pemenang, kitai deka ngatur pekit nentuka sapa bagi menang, manduk upa pantu,” ku Paul.

Pekit Manduk Lauk Set Menu Pemakai Menua nyediaka perais mata duit ungkup champion RM500, lumur dua RM300 lalu penuduk ketiga RM200.

Kelimpah ari nya ku Andrew, raban pengatur pengerami mega ngiga gamal, chura, enggau gaya ukir changkir enggau kung tauka mug ti engkeman nyadika kelai Pengerami Pemakai Menua dudi hari.

Buah penemu tauka rambai penemu ungkup pekit ngiga gamal changkir tu iya nya kampung, belangkau diau di tanah (camping) enggau pemakai menua nya empu lalu tu nerima semua penyereta ari mensia mayuh.

Nya alai ku Andrew, sida ke deka datai ngulu pengerami tu ila diperansang bela ngemai changkir, kung tauka mug dikena diri empu seraya mantaika penau jari diri empu lalu raban pengatur bisi nyediaka perais mata duit RM200.

Pengerami tu deka diatur sehari nyentuk berengkah ari pukul 8 pagi lalu tanya silik tau telefon nuju Andrew Paul (013-800 1580).