Fadillah: Agih belanja RM5 juta ungkup MP BN inisiatif ke manah
KUCHING: Agih belanja RM5 juta setaun nengah Program Transformasyen Menua Pesisir (RTP) ngagai Kaban Parlimen (MP) Barisan Nasional ( BN) di nengeri tu siti ari inisiatif pemadu manah dikena mantu rayat.
Sepenyampau 19 MP mega deka diberi agih belanja RM1 juta enggau RM250,000 setaun, bela nengah geran Projek Mit Pemansang Menua Pesisir (MRP) enggau agih belanja ngatur palan servis.
“Terima kasih ngagai Kepala Menteri Datuk Patinggi Abang Johari Tun Openg ba aih belanja dikemendar nya.
“Tu tentu deka mantu kami bejalaika pangku pengawa ngagai rayat,” ku MP Petra Jaya Datuk Seri Fadillah Yusof lebuhka dirandau kemari.
Ex-Menteri Kereja Raya madahka agih belanja diberi dikena mutarka penanggul ditapi rayat ari semua penyikap perengka guna pemun enggau ke bukai.
“Aku deka betemu enggau pemesai ti ngatur pekara tu ngambi meretika chara enggau baka ni chara ngagih nitihka peminta rayat di sitak nya,” ku iya nerang.
MP Tanjong Manis Yusuf Abd Wahab madahka nengah agih belanja nya sida ulih ngelangkar sereta bejalaika program pemansang begulai enggau dua Kaban Kunsil Nengeri (ADUN) di sitak nya.
“Aku meri besai terima kasih ngagai Kepala Menteri ti udah ngemendarka agih belanja RTP enggau MRP sereta melanja palan servis,” ku iya.
Rambau Pengawa Bepilih Besai Ke-14 (PRU14), BN Sarawak menang 19 ari 31 penuduk.
Taja pia, BN puntan numbuhka perintah besai pengudah Pakatan Harapan menang majoriti ari 222 penuduk.
Perintah nengeri meri agih belanja nya berindik ari MP BN nyadi penyakal di Dewan Rakyat, nyangka sida enda nerima agih belanja ari perintah besai.
Taja pia, naka diatu, nadai pekara dibantaika perintah besai bekaul enggau agih belanja MP penyakal.