Perintah PH dikearap lebih beratka pemansang ba nengeri tu taja nadai pengari dalam kabinet
MUKAH: Perintah baru dikearap terus beratika Sarawak nyadi nengeri ti agi tubah begunaka pemansang taja nadai pengari rayat nengeri tu dipadu gawa dalam kabinet baru.
Kaban Kunsil Nengeri (ADUN) Daro Safiee Ahmad madah naka 14 nama menteri dipadu gawa ngayanka nengeri tu apin bisi pengari dalam kabinet perintah baru.
“Taja pia, kitai patut meri awak ngagai perintah PH ngamatka semaya 100 hari sida dulu,” ku iya madah ngagai Utusan Borneo kemari.
Safiee mansutka jaku nya lebuh dipinta ngelansa pasal pengawa nempa kabinet baru perintah besai ti dikemudi Menteri Besai Tun Dr Mahathir Mohamad.
Nitih ku penerang, rintai nama kabinet nya dipelaba deka ngangkat sumpah pangku pengawa pagila (Hari
Safiee Ahmad ADUN Daro
Satu).
Safiee ngarapka selinting pemansang menua pesisir Sarawak meruan nyadi fokus perintah besai laban enggaika nengeri tu tinggal ari arus pemansang besai.
“Pemerat patut diberi ngagai Sarawak kelebih agi kandang menua ulu ti agi auska pemansang,” ku iya.
Ku iya, pemerat mega patut diberi ngagai pekara di baruh bidang kuasa perintah besai baka sekula, sepital, kelinik sereta mungkur insfratruktur menua pesisir ti bekaul.
Safiee nyemetak madah ngambika pemansang patut dipejalai lurus sereta sebela taja perintah ti megai menua berubah. SARATOK: Kaban Parlimen (MP) Saratok ke lalu nyadi Kaban Kunsil Nengeri (ADUN) Krian, Ali Biju deka ngatur pengerami Mantar Gawai Dayak 2018.
Pengerami tu deka diatur kena 27 Mei (Hari Minggu), bepalan di Rumah Rosita Dugat, Nanga Budu Krian Saratok.
Bemacham aktiviti deka diatur sepanjai pengerami nya ila baka panggau pemerindang enggau Pekit Kumang Saratok 2018.
Ba Pekit Kumang Saratok 2018, perais ti bisi disedia ungkup bala pemenang iya nya champion deka nerima perais mata duit RM1,500, trofi enggau hamper, kedua RM1,000, trofi enggau hamper, seraya penuduk ketiga deka pulai ngemai perais mata duit RM750, trofi enggau hemper.
Berindik ari nya, peranak kelebih agi ari sitak Parlimen Saratok ditesau sampal datai ngerichahka agi pengerami lemai nya.