Pengajar prasekula patut nyereta latih, kus ti disedia
MIRI: Menteri Muda Dagang Temuai, Art enggau Main Asal Datuk Lee Kim Shin nangkan bala pengajar prasekula patut nambahka agi penemu diri nyereta mayuh latih enggau kus ke bisi disedia.
Ku iya, tu sebengkah ari chara dikena nyikap diri napi pemar pekara pelajar ke majak ngerembai.
“Ukai semina pengajar ba renggat sekula primari enggau sekondari aja tang mega pengajar ba renggat prasekula baka ba tadika enggau taska.
“Pia mega, sida (pengajar tadika enggau taska) betapi enggau pemar diri empu dalam meri pelajar tumu ngagai bala anak mit,: ku iya rambau Pengerami Hari Guru diatur Gerempung Apai Indai enggau Tauke Tadika/ Taska Miri ditu kemari.
Kaban Kunsil Nengeri (ADUN) Senadin nya madah nambahka pengelandik diri nengah kus enggau latih entara pekara ti dikemerat dikena ngemansangka diri dalam napi pemar dunya pelajar.
Sama bisi datai ADUN Piasau Datuk Sebastian Ting enggau Chairman Gerempung Tauke Tadika/Taska Miri, Sim Siew Fong.
Berebak enggau nya, Lee minta bala pengajar prasekula ngayanka ulah ti siru eng- gau pengasih ngagai bala nembiak ke diajar sida.
“Ayanka ulah nyadi ‘indai’ maya ngajar nembiak tadika tauka taska laban nengah nya bala nembiak deka ngasaika diri lebih disayau lalu nelebaka sida nyingkang ngagai dua sekula ke amat,” ku iya.
Tambah mega, iya madah diri chukup pengawa bebasaka pengawa dikereja raban pengajar dalam bejalaika tanggungpengawa sida.
Ba pengerami nya, Lee bisi macha danji ungkup kaban komiti baru gerempung nya ke baru dipadu ungkup taun tu.
Bela bisi diatur nyerumba pengerami tu iya nya nyuaka anugerah ngagai 15 iku pengajar ke udah lama gawa nyadi pengajar prasekula enggau nyuaka insentif ngagai nembiak ke nyulut dalam pelajar.