PH Sarawak deka nguna lambang HARAPAN ba PRN

MIRI: Pakatan Harapan ( PH) Sarawak deka ngena lambang HARAPAN maya kimpin pengawa bepilih dikena ngelai penyerakup antara parti komponen.

Sekretari PH Sarawak, Alan Ling madah ungkup keterubah iya lambang dikena maya kimpin Pengawa Bepilih Nengeri ( PRN) ti dipelaba deka diatur dalam timpuh kurang tiga taun agi.

“Abis jampat kitai ngena lambang tu iya nya maya bediri minta pilih maya PRN ti timpuh abis datai ba taun 2021 tauka tumu agi,” ku iya ditu, kemari.

Alan pechaya PH ngeneguhka struktur gempung enggau koordinasi nuju pengawa nempa kaul kereja manah agi antara parti komponen.

Ku iya, tu nyengkaum ngatur langkar kereja beripih agi enggau pelasar efisyen ungkup semua kaban.

“Fokus enggau pangku pengawa besai kitai iya nya mulaika hak ti lenyau dalam Sempekat Malaysia 1963 enggau Konstitusyen Perintah Besai Malaysia,” ku iya nerang, ke lalu nyadi Sekretari DAP Sarawak.

Kuasa ti patut dipulai ngaul bidang dagang, bayar pupu, pelajar, lumba, servis perintah, pengerai, pengelikun rama, pemansang infrastruktur, minyak enggau gis sereta dagang temuai.

Ku Alan dalam timpuh 100 hari, PH mega numbuhka Komiti Khas Kabinet dianggotai pengari ari Semenanjung Malaysia, Sabah enggau Sarawak ngambi neritka kuasa hak di baruh MA63.

“Komiti mega ngeripot enggau meri perambu nentuka pejalai efektif ngagai kabinet dalam timpuh enam bulan,” ku iya nerang.