Sistem e-tikit dikena ngemanah agi servis pengangkut sungai
SIBU: Sistem e-tikit deka ditumbuhka dikena ngemuntangka pengawa meli tauka buking tikit sepris udah tu ila.
Menteri Muda Perengka Pengangkut Datuk Dr. Jerip Susil madah, sistem nya sebagi ari pengawa deka ngemanahka agi perengka pengangkut sungai.
“Kitai benung berundingka sistem digital tu ngambika mensia mayuh ulih buking tikit sepris sida nengah ‘online’.
“Tu mega siti ari atur kitai ti deka nejuka perengka pengangkut sungai baru tauka moden, sebaka enggau sistem ke dikena meli tikit bilun,” pia ku iya madah maya aum media ditu, kemari.
Dulu agi ari nya, iya ngarika Sapit Kepala Menteri Tan Sri Datuk Amar James Jemut Masing bejadika Kimpin Pengelikun Perengka Pengangkut Sungai beserimbai enggau Operasyen Gawai Dayak, Hari Raya enggau Kemisi Tengan Taun Sekula 2018 ba Penyangkai Sepris Sibu ditu.
Bela datai maya tu iya nya Chairman Opis Sungai Sarawak (LSS) Dr Murni Suhaili enggau Controller Lembaga Sungai- sungai ( LSS) Richard Tajan.
Iya nandu baru madahka sebedau sistem digital nya ulih dikena, sida ke beempu ekspres meseti dulu agi ngerejister ngambi lisin.
Kelimpah ari nya, iya madahka sistem baru nya bela deka nyeliahka penyalah mai mensia mayuh kelalu sarat ngena perengka pengangkut sungai.
“Seraya kitai deka ngemanahka agi sistem perengka pengangkut sungai, sistem digital tu bela nentuka pengelikun mensia mayuh sereta kompeni ke bempu ekspres,” ku iya.
Dr. Jerip ti mega nyadi Kaban Kunsil Nengeri ( ADUN) Mambong bela madah taja sebedau tu bisi penusah nyadi maya bekenaka perengka pengangkut sungai tang taun 2017 nyentuk ke diatu nadai penusah dirikodka bisi nyadi.
“Ukai semina maya Gawai Dayak aja tang kitai ngarapka sepemanjai taun nadai penusah nyadi maya bekenaka perengka pengangkut sungai.
“Nya alai, kitai enda semina neritka undang-undang aja tang chakah nentuka pengelikun perengka bekaul nyengkaum baka pengelikun penyangkai, sepris meseti likun sebedau ulih dikena lalu mensia mayuh empu meseti nemu nama reti nyaga pengelikun diri,” ku iya.