Lapan ejensi perintah deka matau pengangkut sungai nengah ops Gawai
SIBU: Opis Sungai Sarawak ( LSS) udah besedia napi pemayuh mensia mayuh ti pulai ke menua beserimbai enggau Gawai Dayak ti deka datai.
Menteri Muda Perengka Pengangkut Datuk Dr. Jerip Susil madah, piak sida melabaka mensia mayuh di Sektor Sibu- Kapit enggau Sektor Kapit- Balleh/ Putai di Batang Rajang deka nambah pemayuh ari penyampau taun dudi.
“Ketegal nya, LSS deka nambahka penyampau raban dikena nyaup Sitak Tengah maya musin Gawai Dayak tu.
“Pia mega kitai bela nangkan sida ke bempu sepris enggau perengka pengangkut sungai ke bukai nambahka pemayuh ekspres sida nyema patut,” pia ku iya madah.
Maya Operasyen Gawai Dayak 2017, penyampau mensia mayuh nengah Penyangkai Ekspres Sibu iya nya urung 8,000 iku, Penyangkai Sepris Kapit enggau Song (4,000) enggau Waf Belaga, Kapit (2,000).
Iya mantaika jaku tu maya ngarika ngarika Sapit Kepala Menteri Tan Sri Datuk Amar James Jemut Masing bejadika Kimpin Pengelikun Perengka Pengangkut Sungai beserimbai enggau Operasyen Gawai Dayak, Hari Raya enggau Kemisi Tengan Taun Sekula 2018 ba Penyangkai Ekspres Sibu ditu, kemari.
Ku Dr. Jerip, LSS deka ngaga Operasyen Penerit Adat enggau tikas besai ba endur ti patut serata nengeri Sarawak.
Iya madah, operasyen nya tauka Operasyen Gawai Dayak deka diatur 25-31 Mei 2018 (Renggat 1) enggau 8-10 Jun 2018 (Renggat 2).
“Ba Operasyen Hari Raya deka digaga 8-10 Jun 2018 (Renggat 1) enggau 22-24 Jun 2018 (Renggat 2).
“Maya operasyen tu kitai bisi 196 iku raban penerit adat enggau staft LSS sereta 18 buah perau,” ku iya.
Dr. Jerip mega madah, pengawa nya deka dikeringka agi ulih Polis DiRaja Malaysia (14 iku), Marin (5 iku enggau sebuah perau), Opis Tasik Sitak Tengah Sarawak (21 iku enggau dua buah perau), Angkatan Pertahanan Awam Malaysia Sarawak (lapan iku), RELA (12 iku), Opis Menteri Dagang Dalam Nengeri, Koperasi enggau Pengawa Bebeli Barang (tujuh iku) sereta raban ari Ijinsi Penerit Adat Maritim Malaysia.
“Chara operasyen tauka ‘modus operandi’ kitai iya nya digaga nengah chara Statik (matau di penyangkai) enggau matau di sungai ngena perau laju,” ku iya sambil madah kompaun pemadu maksium iya nya RM5,000 ngagai sida ti ningkah undang-undang.
Kelimpah ngansak sida ke bempu sepris ngemeratka pengelikun mensia mayuh, Dr. Jerip bela minta orang ti bempu kapal dagang, kapal kargo, sepris ngambika enda kelalu laju maya mansa perau mit baka perau panjai tauka maya mansa penyangkai rumah panjai.
“Ngarapka semua kitai ulih bekerejasama bela nentuka pejalai diri datai di menua ke dilawa enggau likun,” pia ku iya ngelalau.
Sama bela datai maya tu iya nya Chairman Opis Sungai Sarawak ( LSS) Dr Murni Suhaili enggau Controller LSS Richard Tajan.