Ukai semina mantu nyungkak ekonomi nengeri tang mantu nambahka penatai pemisi orang betanam betupi
KUCHING: Naka ke diatu urung 1,000 agi ruang bilik di nengeri tu dipinta chakah nupi engkelulut sereta ngasilka madu dikena nangkup peminta makit antarbansa.
Direktor Borneo Stingless Bee Sdn Bhd (BSB), Tan Chun Chuang madahka nya sebengkah pekara kerejasama entara BSB enggau perintah nengeri nengah Opis Betanam Betupi ke deka ngangkat sereta ngemansangka industri engkelulut ba Sarawak.
Ku iya, industri tu ukai semina mantu nyungkak ekonomi nengeri tang mega ulih mantu nambahka penatai pemisi orang betanam betupi kelebih agi ke diau ba menua pesisir.
“Kami (BSB) deka nyendia ari sukut teknologi enggau chara ke patut bakani ulih ngasilka madu engkelulut ti manah sereta bekualiti awakka ulih dijual ngagai makit antarabansa.
“Naka ke diatu ari Kuching nyentuk ke Miri bisi lebih 200 iku orang dagang madu engkelulut, pemadu mimit bisi 10 lot sarang kelulut lalu ke pemadu mayuh 300 - 400 lot sarang engkelulut, kenyau ari taun 2016.
“Kitai merambu enggau Opis Betanam Betupi Sarawak deka nambahka 1,000 agi ruang bilik ti sama ngambi bagi dalam industri tu laban makit antarabansa begunaka urung 50 tan metrik sebulan,” ku iya.
Tan dikerandau raban pengarang berita pengudah tembu nyain Sempekat Pemereti Ati (MoU) enggau Perintah Nengeri nengah Opis Betanam Betupi Sarawak ke deka bekerejasama dalam industri kelulut.
Pengawa nyain MoU nya dikemataka Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas, ti diatur ba Wisma Bapa Malaysia ditu, kemari.
Nitihku Tan naka ke diatu rega BSB meli asil madu engkelulut ari orang ke ngemeranka nya ba nengeri tu iya nya RM80 sekilogram.
Tambah mega ku iya, ungkus dikena ngepunka nupi engkelulut ba Sarawak enda kelalu mar enti dibandingka enggau Semenanjung Malaysia laban engkelulut ditu bisi sarang asal.
Lot sarang engkelulut ke dijual berega urung RM100 lebih, ku iya.
“Asil madu tu mantu nyungkak penatai pemisi sebuah ruang bilik. Ambika chunto sebuah ruang bilik ulih ngasilka madu engkelulut 50 kilogram sebulan sereta rega sekilogram RM80, lalu asil sebulan ari madu kelulut tu RM4,000 sebulan.
“Ba Sarawak, tebal agi kandang endur tebing pantai ke bisi nupi engkelulut iya nya di Sibu, Sarikei, Tanjung Manis, Kuching, Sri Aman, Bintulu enggau Miri,” ku iya.
Kelimpah ari nya, Tan madahka makit BSB endur nyual madu engkelulut iya nya ngagai China, Hong Kong, Korea, Taiwan, Singapura enggau menua Timur Tengah.
Kami (BSB) deka nyendia ari sukut teknologi enggau chara ke patut bakani ulih ngasilka madu engkelulut ti manah sereta bekualiti awakka ulih dijual ngagai makit antarabansa Tan Chun Chuang Direktor Borneo Stingless Bee Sdn Bhd (BSB)