Perintah Pakatan Harapan dikearap beratka pekara pelajar di Sarawak
KUCHING: Perintah besai ke baru ari baruh pegai Pakatan Harapan (PH) patut lurus ngemansangka menua taja Sarawak ari baruh pegai Perintah Barisan Nasional (BN).
Penganalisis politik ke mega pengelicha dalam bidang politik di Fakulti Sains Sosial dan Kemanusiaan Unimas, Dick Lembang Dugun madah, kelebih agi bekaul enggau pekara pelajar di menua pesisir, ti chukup beguna ngagai peranak Sarawak.
“Kitai sama udah nemu dalam Semaya PH maya Pengawa Bepilih Besai (PRU) tu tadi enggau ari sukut pelajar tauka sekula, aku pechaya perintah baru deka beratka pekara tu.
“Kebuah pia pelajar nyadi siti ari chara ti ulih ngubah idup rayat kelebih agi di menua pesisir lalu aku arap amat perintah baru deka meri pemerat ngagai sekula di menua pesisir,” ku iya madah ngagai Utusan Borneo ditu, apin lama ke udah.
Ku Dick, ba pekara ngemansangka menua pesisir dipechaya perintah besai baru patut bekerejasama enggau perintah nengeri ngambika pengawa nya ulih dipejalai sereta dirumban.
Ku iya, pekara ke baka tu patut diperati sereta diserenih berindik ari Sarawak diatu agi dipegai perintah BN tang ba renggat perintah besai dipegai perintah PH.
Ku iya, tu ngambika semua rayat Sarawak nemu kelebih agi di menua pesisir ke alai diatu Sarawak nyadi nengeri penyakal ba renggat perintah besai pengudah BN alah ba PRU tu tadi.
“Nya alai, ba pengawa ngemansangka kandang menua pesisir ila kitai deka meda kerejasama antara Sarawak enggau perintah besai dikena nentuka tikas pemansang kitai di menua pesisir.
“Sekalika sida sepenemu tauka enda? Pekara tu ti deka diperatika kami ti nyadi penganalisis,” ku iya.
Ngenang semua pekara pasal ketuai ti diatu ti betuaika Tun Dr Mahathir Mohamad ke nyadi Menteri Besai, Dick madah, bepelasarka peneleba Tun sebedau tu, engka meri pengelebih ngagai iya ngiring Malaysia.
Majoriti rayat Malaysia ku iya, meri sukung kelebih agi raban nembiak diatu tentu dekaka raban Tun Mahathir ti ngiring menua tu ngamatka semaya udah dipadah dalam Manifesto PH maya PRU tu tadi.
“Aku pechaya nengah pengeran deka meda rayat ti dekaka menua dikemansang baka menua bukai, perintah baru betuaika Tun Mahathir, deka ngamatka semaya dalam manifesto sida.