Semina tiga iku menteri berani besebana sentang Najib bekaul kes SRC International Sdn Bhd
KUALA LUMPUR: Ketuai Komisionyer Opis Nagang Pengawa Makai Suap Malaysia (SPRM) Datuk Seri Mohd Shukri Abdull madahka iya enggau ex-ketuai iya Tan Sri Abu Kassim Mohamed udah berandau enggau beberapa menteri kabinet sebedau tu ngumbuk sida bejalaika atur ngagai Datuk Seri Najib Tun Razak.
Ku iya, pengawa nya berindik ari asil pansik SPRM dalam taun 2015 bekaul enggau isu wang turu RM2.6 bilion enggau RM42 milion ti dipelaba dipindah ari SRC International Sdn Bhd ke dalam akaun bank Najib, ti maya nya nyadi menteri besai.
Taja pia ku iya, semina tiga menteri aja maya nya berani bejaku bekaul enggau nya, iya nya ex-Sapit Kepala Menteri Tan Sri Muhyiddin Yassin, ex-Menteri Pemansang Menua Pesisir enggau Kandang Menua Datuk Seri Mohd Shafie Apdal enggau exMenteri Wang kedua Datuk Seri Ahmad Husni Mohamad Hanadzlah.
“Taja dipejal, kami duai (Mohd Shukri enggau Abu Kassim) enda kala mantul. Aku berandau enggau beberapa menteri lalu Tan Sri Abu Kassim berandau enggau beberapa iku menteri ngumbuk sida ke alai kes RM2.6 bilion enggau RM42 milion SRC International iya nya kes ti amat, ukai nya kes ditempa ngapa.
“Kami madah ngagai bala menteri nya, buai orang tu, buai orang ti makai suap tu, silih enggau orang bukai enti sayauka menua.
“Buai Najib enggau silih enggau orang bukai, silih enggau Datuk Seri Ahmad Zahid Hamidi tauka Datuk Seri Hishammuddin Tun Hussein, orang ti bisi integriti manah nyadi menteri besai,” ku iya ba aum pengarang berita di Indu Opis SPRM di Putrajaya, ke bela dipancharka terus beberapa stesyen televisyen sehari kemari.
Mohd Shukri madah taja pia, pengawa iya enggau Abu Kassim puntan pengudah semina tiga iku menteri nya aja ti berani bejalaika pengawa seraya menteri bukai enda berani ngereja nya.
Ku iya, lebuh perintah Barisan Nasional dipegai Najib alah ba Pengawa Bepilih Besai Ke-14 apin lama udah, mayuh menteri ti dikerandau iya dalam taun 2015 udah ngangauka iya lalu madahka diri nesal laban enda bejalaika atur ngagai Najib.
“Aku madah ngagai bala menteri nya aku nadai pemerat. Ukai aku minta duit, ukai aku minta pangku pengawa. Aku madah pekara ti amat ngambika kitai ngemetulka pekara nya sebedau laun.
“Tu pasal 1MDB, RM2.6 bilion ukai cherita ditempa ngapa, tu cherita amat lalu kes tu kelalu besai dilalai,” ku iya.
Mohd Shukri mega madah ba aum pengarang berita nya ke alai pengudah ngumbuk bala menteri lebuh nya enda mujur baka ti dikedeka, iya enggau Abu Kassim udah nya ngatur randau enggau Majlis Raja-raja ngambi meri pengandal ngagai bala kaunsil nya bejalaika atur ngagai Najib.
“Kami ngambi inisiatif laban sayauka menua sereta betemu enggau Majlis Raja-raja...dua kali kami betemu lalu kami udah minta ngagai Tuanku, tulung mih tuanku beratika pekara tu, tang kami asa,” ku iya.
Mohd Shukri diripot nyadi orang ti nembuka dua keretas pansik bekaul enggau kes wang turu RM2.6 bilion enggau SRC International.
Lebuh nya, iya nyadi Sapit Ketuai Komisionyer (Operasyen) SPRM sebedau pinchin dalam taun 2016.
Menteri Besai Tun Dr Mahathir Mohamad apin lama ke udah nyiri baru Mohd Shukri nyadi ketuai pesuruhjaya SPRM dikena nyilih Tan Sri Dzulkifli Ahmad ti ngemaduka diri gawa. — Bernama KUCHING: Perintah nengeri terus chakah mantu nyungkak penatai pemisi orang betanam betupi kelebih agi di menua pesisir nyengkaum nengah industri madu engkelulut.
Sapit Kepala Menteri, Datuk Amar Douglas Uggah Embas madahka nya kelimpah ari meransang orang betanam betupi di menua pesisir nengah pengawa nanam lada, sawit enggau getah.
Berindik ari pekara nya perintah nengeri ti diarika Opis Betanam Betupi Sarawak udah nyain Sempekat Pemereti Ati (MoU) enggau Borneo Stingless Bee Sdn Bhd (BSB), ti deka ngemansangka industri engkelulut, ku iya.
“Sehari tu kitai nyain MoU enggau Borneo Stingless Bee Sdn Bhd, ti lebih mekuh ngagai makit.
“Objektif MoU tu dikena nempa mekanisma bakani deka ngangkatka orang betanam betupi menua pesisir ngagai industri tu.
“Penemu tu dikena kitai nambahka penatai pemisi orang betanam betupi ngena chara bukai kelimpah ari nanam lada, sawit enggau getah,” ku iya.
Uggah ti mega Menteri Betanam Betupi Moden, Tanah Adat enggau Pemansang Kandang Menua mansutka pekara nya lebuh bejaku ba pengawa nyain MoU entara Perintah Nengeri enggau BSB ke diatur ba Bilik Baum opis iya di Wisma Bapa Malaysia ditu, kemari.
“Kitai chukup meransang orang betanam betupi kitai ngemeranka pengawa tu laban tu enda mar, nadai kiruh meri makai laban ngkelulut ngiga pemakai ke diri empu, udah nya kelulut nya ngasilka madu.
“Kitai ngarapka industri kelulut deka ulih nyendia sereta siti ari chara nambahka penatai pemisi orang betanam betupi mit kitai,” ku iya lebuh dikerandau.
Perintah Nengeri diarika Opis Betanam Betupi Sarawak iya nya Pemangku Direktor Dr. Alvin Chai Lian Kuet enggau lalu Stingless Bee Sdn Bhd diarikaDirektor, Tan Chun Chuang.
Nya MoU kedua bekaul enggau pengawa ngemansangka industri kelulut ba nengeri tu, pengudah dulu ari tu kena 23 April2018 enggau Rimbunan Hijau Sdn Bhd.
Opis Betanam Betupi deka silik agi berandau, merambu sereta bejalaika beberapa program enggau kededua kompeni BSB sereta Rimbunan Hijau Sdn Bhd.
Nengah chara tu, nengeri ulih nyadi penyual pemakai ngagai menua lebuh manggai taun 2030. Tu mega ulih dijapai nengah kerejasama sektor peribit ke bisi teknologi, pakar sereta udah bisi makit nyengkaaum ba renggat dunya.
Entara objektif ke bukai MoU enggau BSB iya nya kerejasama ngasilka madu engkelulut ti bekualiti sereta dijual ngagai menua tasik kelimpah ba menua tu empu. Nambahka nya betukar penemu enggau teknologi inovasyen dalam industri engkelulut sereta ke bukai.
Sama bisi datai Menteri Muda Pemansang Tanah Adat Datuk Roland Sagah enggau Sekretari Mendam Opis Menteri Betanam Betupi Moden, Tanah Adat enggau Pemansang Kandang Menua Datu Ik Pahon Joyik sereta Direktor BSB Tan Kai Yong enggau ke bukai.