JKMS Miri nyelamat siku ex-gangster ke nyadi ‘orang gelendangan’
MIRI: Tu udah masuk tiga bulan siku lelaki ke kala nyadi ‘gangster’ ngenduh ba langkau ke digaga kediri empu ari kayu enggau kutak, di Lee Tak Park dalam kandang nengeri Bandaraya Miri.
Lelaki nya ke berumur 47 taun madahka nama iya Yu Tien Nguon, lalu endur iya diau ke ditemu penudi iya di Pujut 5 ngaga laman Opis Kunsil Bandaraya Miri (MCC) nyadi pengentap alai iya diau sementara.
“Kami ngelawa siku lelaki ke dipeda semina ngena tanchut pandak dalam langkau di laman tu, pengudah nerima ripot ari mensia mayuh,” ku pegawai Opis Pengelantang Pendiau (JKM) nya, Ruzi Kalong madah ngagai Borneo Post, kemari.
Ruzi ke disempulang ulih dua iku pegawai opis nya, Siti Fatimah enggau Fred Chalton dipeda ngangau lelaki nya lebuh sida iya ngelawa langkau lelaki nya.
Iya madah, sida iya nganti nyangka bisi dalam kandang lima belas minit baru lelaki nya pansut, ngena tanchut pandak enggau baju ‘T’ ke kamah.
Lelaki nya pan dipeda mauh endar ba selangkuh tubuh iya udah dipantang, kededua lengan enggau kaki iya, lalu semina nemu bejaku Melayu mimit lebuh iya bejaku enggau pegawai JKM nya.
Sebedau nya, Yu dipeda tinduk dalam langkau ke penuh enggau kutak, besi sereta kayu.
Ruzi madahka opis sida iya bisi dipadah ulih mensia mayuh ke madahka siku lelaki ditemu tinduk di laman alai mensia mayuh belelak, ke ngujungka sida iya lalu datai meresa endur nya.
“Kami bisi berandau enggau lelaki nya, lalu iya bisi madah ngagai kami, iya diau di langkau nya kediri, lalu nadai duit deka nyuwa endur bukai tauka diau ba rumah ke menyana agi,” ku Ruzi.
Ku Yu madah ngagai pegawai JKM nya, iya kala nyadi ‘gangster’ lalu diatu nadai endur ngenduh agi lalu diau di laman nya laban enda ulih mayar suwa bilik.
Iya madah iya nadai sebarang penanggul enti pegawai ari JKM nya deka nganjung iya ngagai palan alai orang nyuman penyakit, ngambika iya ulih gawa lalu diau dalam pendiau ke menyana.
“Aku nadai endur diau, lalu nadai pemisi kena mayar suwa, nya kebuah aku diau ditu,” ku iya.
Ruzi madah, Yu deka dianjung beperesa lalu berubat ngagai Sepital Miri lalu udah nya ila nyangka nganjung iya ngenduh dulu ba siti palan di Kuching.
Taja pia, Yu madahka meri iya timpuh ngagai hari Lima minggu tu, laban iya deka nyual besi ke dituggung iya ba luar langkau alai iya ngenduh nya, lalu asil ari besi ti dijual nya, ulih dikena iya mayar utang iya.