Ari sukut raban ke ditagit, pengawa opis menteri nya mayuh sebaka enggau KKKWK
KUCHING: Opis Menteri Pekara bekait enggau Orang Indu engga Pengelantang Pendiau (KHEWK) ke baru baruh pegai Perintah Besai dikarap beratika pemerat Sarawak ngelayang garis menua sereta kandang menua.
Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWK), Dato Sri Fatimah Abdullah madah, tu ngambika tuju sererta pemerat di kededua opis menteri nya, kelebih agi mantu raban ke patut, ulih dipajakka.
Iya madah, ari sukut raban ke ditagit, tuju sereta pengawa opis menteri nya mayuh pekara ke nyauka sebaka enggau opis menteri di Sarawak.
“Bida nya, opis menteri kami bisi pampang Pemansang Anak Mit enggau Pengelantang Pendiau Komuniti.
“Komponen Pengelantang Pendiau Komuniti iya nya lis ke sebaka enggau Perintah Menua nerima ungkup ari Perintah Besai sebedau tu,” ku iya madah lebuh dikerandau ulih Utusan Borneo ditu, kemari.
Iya madah, entara nya nyengkaum bantu tetiap ninting bulan ngagai orang tuai, bantu ke anak mit (indai tunggal), orang ke timpang pendiau, orang sakit kelimpah ari bantu anak ke dijaga.
Bantu bukai baka Palan Pengerai Dalam Komuniti (PDK), Palan Aktiviti Orang Tuai (PAWE) enggau Palan Aktiviti Anak Mit (PAKK).
“Sigi aku ngarapka bantu bansa tu deka dipajakka.
“Lalu baka nya mega enggau program ngenegapka orang indu nengah penge- landik macha undang- undang, ekonomi, nyadi ketuai sereta ngaga pemutus mega patut dipajakka,” ku iya.
Berindik ari pekara nya ku Fatimah, iya ngarapka opis menteri beratika pemerat Sarawak ngelayang garis politik sererta kandang menua.
Ba randau nya mega, iya meri puji ngagai Datuk Seri Dr Wan Azizah Wan Ismail laban udah dituduh mangku pengawa nyadi Sapit Menteri Besai lalu bela mangku pengawa nyadi Menteri ke bisi bekait enggau Orang Indu enggau Pengelantang Pendiau.
Hari Satu tu tadi, tiga belas menteri kabinet perintah Pakatan Harapan (PH) udah ngangkat sumpah mangku pengawa sida iya ba mua Yang di-Pertuan Agong di Istana Negara.
Atur pengawa ti digaga di Singgahsana Kecil nya berengkah dalam urung pukul 5.50 lemai, alai Wan Azizah Wan Ismail ke dituduh mangku pengawa nyadi Menteri bekait enggau Orang Indu enggau Pengelantang Pendiau ngulu rintai menteri bukai ba atur pengawa nya.
Bida nya, opis menteri kami bisi pampang Pemansang Anak Mit enggau Pengelantang Pendiau Komuniti. Komponen Pengelantang Pendiau Komuniti nya lis ke sebaka enggau Perintah Menua, nerima ungkup ari Perintah Besai sebedau tu. Dato Sri Fatimah Abdullah Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit