329 pesereta udah nerima dividen
SIBU: Ta Ann Pelita Durin Plantation Sdn Bhd udah nyuaka dividen keterubah sepenyampau RM450,000 ngagai penyereta Projek Pemansang Tanah Hak Adat Bumiputera ( HAB) Block Durin.
Dividen tu diterima 329 iku pesereta ari 16 buah rumah panjai ba Rumah Monica Gelima, Sungai Durin ditu, kemari.
Ba pengawa nya, Direkter Besai Ta Ann Plantation Sdn Bhd Simon Ling Yu Kiong madah, projek nanam sawit tu dikereja nengah kerejasama mungkur pemesai tanah 902 hektar.
“Ba taun 2017, asil ari projek ti belabuh ari taun 2009 tu iya nya 18,672 matrik tan.
“Dividen ke disua ngagai penyereta tu mandangka piak kitai semampai beratka pekara ti bekaul enggau hak penyereta projek,” pia ku iya madah.
Iya mantaika jaku tu sebedau dipebasa nyuaka dividen nya.
Bela datai maya tu iya nya Manijer Pelita Holdings Francis Kiyuk enggau Chairman Komiti Menua projek nya Kaunsilor Tuai Rumah John Ujang sereta bala bukai.
Nambahka jaku iya, Simon ngarika piak sida meri besai terima kasih ngagai bala penyereta ti meri kerejasama ngagai projek nyentuk ke mujur baka sehari tu.
“Kitai mega ngelaluka mensia mayuh ke bukai ti bisi tanah ke deka ngaga projek kerejasama baka tu.
“Nyema bisi ati kita tau betemu enggau piak kami,” ku iya madah baru.
Kelimpah ngaga projek, Simon madahka sida bela beratika pekara bukai bekaul enggau mensia mayuh ke besemak enggau palan projek.
“Tu nyengkaum nyendiaka awak kereja ngagai mensia mayuh kelimpah penyereta projek empu,” pia ku iya madah.
Bekaul enggau awak gawa ba projek nya, John sebedau nya bela mantaika pekara ti sama.
Ku iya, bala penyereta projek patut dikemeratka dulu ngisi awak gawa ba projek kerejasama nya.
“Pekara tu endang udah dalam sempekat kitai suba lalu ngarapka bala kitai dulu agi dikangau nyema bisi awak gawa,” ku iya madah.
Bekaul enggau projek nya, iya madah, sebedau belabuh suba bala penyereta endang bisi baum dulu lalu setujuka projek nya digaga.
“Nya alai, nadai isu kompeni ngambi tanah kitai ditu,” pia ku iya nerang.