PKS dipinta matau peluang baru ngangkatka produktiviti lalu ngurangka ungkus belanja dagang
SIBU: Dagang Mit enggau Jelan Pemesai (PKS) dipinta ngiga awak baru dikena ngangkatka produktiviti diri seraya ngurangka agi ungkus belanja bedagang.
Menteri Dagang Antrabansa enggau E-Dagang Dato Sri Wong Soon Koh madah, PKS tu nyadika pengering pemansang penatai pemisi menua enggau penyampau orang dagang ba sektor nya bela nambah.
Penyampau nya ku iya, nejuka diatu 97 peratus dagang di Malaysia iya nya PKS.
“Diatu PKS ba jeman digital sereta numbuhka edagang.
“Ngagai sida ti bisi produk tauka servis ke manah ti tau dijual nengah internet diatu kita ulih ngena awak baru nya (teknologi digital),” pia ku iya madah.
Iya mantaika jaku nya maya bejadi The Malaysian Entrepreneurs Festival (TMEF) ke diatur ba sebuah hotel ditu, kemari.
Sama bela datai maya tu iya nya penengkebang TMEF, Presiden Ng Eng Heng enggau Sapit Presiden Amy Loo.
Wong ti mega Menteri Wang II madah, kenyau ari taun 2000, maya orang bekenaka internet majak nambah, penyampau mensia mayuh bekaul enggau pangan diri nengah teknologi digital mega mayuh.
Iya madah, teknologi digital bela ngerandang awak ngagai orang dagang rebak baru ngembuan runding deka ngemanahka agi produk dagang sida.
Kelimpah ari nya, iya bela madahka pemansang teknologi digital besai reti ngagai ngagai pemansang menua tu ngambika ulih nunda pemansang menua bukai tang randaka saup ari semua rayat.
“Teknologi baru enggau media rama ukai semina ngubah chara bedagang menua tu tang mega ba renggat global,” ku iya sambil nambah teknologi digital baka telefon, media rama enggau kereban ti bepelasarka internet mai ubah ke besai ba tikas pengawa dagang.