Kort Tinggi netapka 3 Julai tandu pechara kes bunuh Bill Kayong
MIRI: Kort Tinggi kemari netapka 3 Julai ila mendingka penerang ari kededua piak ba kes kepenudi Mohamad Fitri Pauzi ti dituduh munuh aktivis rama, Bill Kayong.
Pengawa netapka hari bulan digaga Hakim Ravinthran N.Paramaguru ba kes kepenudi Fitri ti nyadi orang dituduh keterubah dalam kes munuh nya.
Dulu agi ari nya, kort mega mendingka penerang ari siku kaban kimia, Farah Ad-Din Nordin ti nyadi saksi ke-18 dalam pechara kes munuh Bill Kayong.
Farah, 31, siku pakar ‘sisa tembakan’ ari indu opis Opis Kimia Malaysia (JKM) Petaling Jaya udah dikangau baru ngambika ‘diperiksa balas’ ari peguambela Ranbir Singh ti ngarika orang ti dituduh.
Lebuhka ‘ diperiksa balas’ ari Ranbir, Farah setuju enggau penerang peguambela nya ke alai semua atur pejalai analisis barang kes udah digaga Mohd Firdaus Ramli lalu iya empu semina macha pemutus analisis nya.
Seraya lebuhka ditanya Timbalan Pendakwa Raya (TPR) Nur Nisla Latif, nama kebuah iya setuju enggau penerang nya, ku Farah nerang, lebuh atur pejalai analisis digaga, Mohd Firdaus ti ngatur kereban ti dikena ngaga analisis nya.
Ku iya, lebuh analisis digaga, Mohd Firdaus ti gawa ngatur kereban dikena ngaga analisis sehari nya, lalu iya bisi di makmal.
Ba siti tanya bukai, enti sema Mohd Firdaus ti ngaga analisis, nama kebuah iya patut ngaga bacha pemutus, Farah nyaut laban kes (barang kes) nya nyadi kes ti diatur iya.
Mohamad Fitri Pauzi, 30, ari Jalai Dawai 1 Pujut 4D ditu udah didawa nitihka Seksyen 302 Kanun Keseksaan laban penyalah munuh ngujungka pemati niang Bill Kayong.
Enti dituku salah, iya ti dituduh tau ditinggang ukum mati mandatori.
Penyalah nya didawa dik- ereja iya ti dituduh urung pukul jam 8.20 pagi, 21 Jun 2016 di simpang lampu trafik besemak enggau Pasaraya Emart, Jalai Kuala Baram Bypass ditu.
Sama bisi datai di kort peguambela Orlando Chua enggau Arthur Lee ngagai raban pembelaan enggau Majen Panyog ti nyadi luyar pemerati ngagai sida niang Bill sebilik.