NGO di Kapit minta perintah ngemanahka jalai ari Song ke Kanowit
KAPIT: Sekeda Gerempung Ukai Dikuasa Perintah (NGO) ditu ngapil ngagai perintah ngintu jalai peribit ari Song ngagai Ngungun, Kanowit kelebih agi maya pengerami Gawai Dayak ti deka datai ungkup pengelantang enggau pengelikun sida ti betengahka jalai ditu.
“Kami ngapil ngambika perintah nengeri enggau perintah besai bela ngintu jalai ari Tamalat, Song ngagai Ngungun, Kanowit, kelebih agi ba jalai peribit maya musim Gawai. Kami ngapil ngagai raban bekuasa bekaul nganjung raban gawa sereta lipan kita nentuka jalai setengah bebatu enggau tanah liat dia likun ditengah.
“Maya hari panas jalai nya ulih ditengah tang enti hari ujan, kenda likun ditengah laban kelalu tebiang, lichau enggau beribut. Kami tentu berasai lantang enti bisi raban RELA tauka polis ulih gawa matau Jalai Kanowit- Kapit nentuka pengelikun semua,” ku Chairman Serakup Graduet Dayak Sarawak ( SDGA) Kapit, Layang Ugek ke lalu nyadi Mandal Chairman Gerempung Bansa Dayak Sarawak (SDNU) Kapit.
“Ngerunding pengerami Gawai Dayak ti deka datai, ke diintu kena 1 enggau 2 Jun, kami melabaka mayuh sida ti ngintu Gawai enggau bala pengusung ari serata nengeri deka mindah nengah jalai tu ngagai Kapit.
“Belalauka perati kami, ninting taun bisi 15,000 iku sida ke datai ari jauh enggau semak mulaika diri ngagai rumah panjai, begelumu enggau diri sebilik ngintu hari besai. Nyauka semua ruang bilik bisi entukar kelebih agi 4WD.
“Kitai ngadang mayuh sida deriba ari Kanowit- Song, Kanowit-Kapit lalu nampung pejalai ngagai menua ulu baka Baleh enggau Nanga Merit, Batang Rajang. Maya mindah enggau diri sebilik, deka mudah sereta ekonomi agi. Ari pemisi jalai, sida milih deriba laban lantang agi sereta enda besekut enggau mensia mayuh dalam bot ekspres,” ku Layang.
Begulai enggau chairman Serakup Veteran ATM Pampang Kapit, Martin Bilun ke mega chairman JKKK Tatai Mas Raweng, Ulu Sungai Amang, Jalai Selirik ditu rambau aum pengarang berita pagi kemari.
Belalauka timbal ari sida ti betengahka jalai, Jalai KapitSong 44 km manah. Nadai penanggul lalu dipelaba deka tembu pengujung bulan Julai taun tu.
Penanggul besai ari Song ngagai Kanowit iya nya renggat 1 9.6 km enggau Ngungun Bypass 5.1 km, raban kunteriktor baru mindah ngagai taba nya. Timpuh kunterik 36 bulan.
Pemar besai ditapi ba jalai peribit, jalai batang enggau jalai ladang sawit, 22 km penyauh, ti enda likun ditengah laban bekerangan enggau jalai tanah liat. Maya hari manah, tanah rangkai, ulih ditengah, tang hari ujan, luchak, lichau sereta beribut lalu enda ulih ditengah.
Jalai Kapit-Song-Kanowit 88 km pemanjai iya nya projek dipelanja Perintah Besai ari Opis Menteri Pemansang Menua Pesisir enggau Kandang Menua (KKLW).
Kapit ti nyadi garis entara menua kepenudi di nengeri tu, kenyau ari 60 taun ke udah, iya dikumbai pulau ti semina ulih dilawa nengah bot, tiga jam pejalai ari Sibu.
Projek jalai berengkah digaga dalam taun 2015 lalu dipelaba tembu datai ba taun 2020. Kenyau ari nya, mayuh sida ti bempu entukar milih diri derita ari ke milih pejalai ngena bot. Kebuah pia laban sida ulih ngelawa semua bagi menua di nengeri tu lebuhka deriba.