Perintah nengeri nadai udah ngaga sebarang pemutus sekalika nama nya ditingkil tauka enda, ku Abang Johari
KUCHING: Editor Sarawak Report Clare RewcastleBrown, naka ke diatu agi dalam rintai enda dikemendarka tama ke Sarawak.
Kepala Menteri Datuk Patinggi Abang Johari Tun Openg madahka perintah nengeri nadai udah ngaga sebarang pemutus sekalika nama nya ditingkil tauka enda.
Clare enda dikemendarka tama ke Sarawak kenyau ari 3 Julai 2013.
“Nama iya agi dalam rintai kenyau ari maya iring Tun Pehin Sri Abdul Taib Mahmud nyadi Kepala Menteri sereta maya niang Pehin Sri Tan Sri Adenan Satem nyadi Kepala Menteri.
“(Clare) Agi ba rintai nama (enda dikemendarka tama ke Sarawak). Aku nadai udah ngaga sebarang pemutus,” ku iya lebuh ditanya bekaul enggau pekara nya.
Nama iya agi dalam rintai kenyau ari maya iring Tun Pehin Sri Abdul Taib Mahmud nyadi Kepala Menteri sereta maya niang Pehin Sri Tan Sri Adenan Satem nyadi Kepala Menteri. Datuk Patinggi Abang Johari Tun Openg Kepala Menteri Sarawak
Dulu ari nya Abang Johari bejadika pengerami nyuaka ‘ Sumbangsih Kuih Gawai Raya 2018’ ke diatur ba Dewan Kunsil Nengeri (DUN) lama ditu, sehari tu.
Clare pemeri penerang ti kala dituduh orang ke merambu numbangka Datuk Seri Najib Tun Razak maya ke nyadi Menteri Besai, diatu dikemendarka tama ke Malaysia.
Diatu Clare peneka ati tama ke Malaysia pengudah Perintah Malaysia betukar asil ari pemutus Pengawa Bepilih Besai Ke-14, apin lama.
Kelimpah ari nya Abang Johari lebuh dipinta meri penerang pasal kabinet baru Perintah Besai Pakatan Harapan, iya enggai meri sebarang penerang.
Iya bepenemu bepanggai ngagai Menteri Besai nentuka sapa ke nyadi menteri nyengkaum ari nengeri tu.
“Aku enda nemu, nya bepanggai ba Harapan. Aku enggai meri penerang, sida (PH) ngaga pemutus,” ku iya ti enggai meri penerang silik.