Silih insentif ke disemaya enggau ke bukai ti manah agi
KUCHING: Pengawa beratika baru bayar insentif ngagai pengereja pengawa perintah ari perintah besai baru ti diperambu ngambika disilih enggau insentif bukai ke manah agi ari sebedau tu.
Chairman Kongres Gempung Orang Gawa Perintah ( CUEPACS) Nengeri Sarawak tauka CNS Ahmad Malie madah, CNS ngasaika endang enda ulih perintah baru bejalaika pengawa enda ngemajakka insentif ti chukup sensitif nya.
“Taja perintah baru bisi juluk deka beratika baru insentif nya, CNS ngasaika endang enda ulih perintah baru ngemajakka insentif ti chukup sensitif tu.
“Tu tau ngasa semua pengereja pengawa perintah enti enda disilih enggau siti pekara manah agi ari ti disemaya perintah ke dulu,” ku iya madah ngagai Utusan Borneo ditu, kemari.
Ku iya taja pia, CNS agi bepenemu positif bekaul enggau pengawa beratika baru nya ungkup sementara lalu agi nerima enti sema Peniki Gaji Ninting Taun (KGT) khas ungkup semua pengereja pengawa perintah baka ti disemaya perintah sebedau tu diserenih enggau diperatika perintah baru.
“Taja perintah baru bisi juluk nyerenih baru bayar insentif tu, CNS tetap bepenemu positif sereta melabaka perintah baru deka mantaika insentif ke manah agi ari ti disemaya perintah sebedau tu,” ku iya.
Ku Ahmad, berindik ari nya CNS ngansak semua pengereja pengawa perintah di Sarawak nerima seraya nganti sebarang pemutus ari perintah baru ke bisi diatu.
Ku iya, CNS endang ngarapka berita manah deka dibantaika perintah baru laban meretika sida nyadi perintah ti beratka rayat.
Berebak enggau nya, Ahmad ngarapka semua pengereja pengawa perintah kelebih agi di Sarawak jenuh dulu seraya ke nganti bulan Julai.
Iya mansutka jaku nya nge nang pasal status KGT ungkup semua pengereja pengawa perintah ti diterit kena 1 Julai tu deka ditentuka baru perintah baru ila.
Ketuai Sekretari Menua, Tan Sri Dr Ali Hamsa, madah pengawa mantaika peniki KGT kena 1 Julai nya digaga perintah ke dulu lalu diatu bepanggai ba perintah baru sekalika deka bejalaika nya tauka enda.
“KGT tu iya nya semaya ( perintah) ke dulu, diatu kitai ngelempai ba perintah baru ngemajakka nya. Kitai nitihka manifesto perintah diatu,” ku Hamsa.
Ba Majlis Amanat Perdana Perkhidmatan Awam (MAPPA) ti ke-16 kena 4 April tu tadi, ex-Menteri Besai Datuk Seri Najib Razak, madahka perintah setuju deka nikika gaji besebaka enggau satu KGT ngagai semua pengereja pengawa perintah berengkah diteritka 1 Julai 2018.