Bazar Gawai Dayak patut dirami besai
MIRI: Program Bazar Gawai Dayak patut dirami besai ngambika iya ulih nyadi siti utai ke tau matak temuai kelimpah mantu nyungka ekonomi peranak menua tu.
Menteri Muda Kaunsil Kandang Menua Datu Dr Penguang Manggil madah, program tu endang nerima sukung ke manah ari bansa Dayak.
“Nengah pengawa ngatur Bazar Gawai Dayak kitai ukai semina ulih ngelakuka produk diri, tang mega penyelai bansa Dayak ulih dipeda nengah barang ke dijual baka pemakai asal, kraf jari, kain tenun enggau ke bukai.
“Nyadi ari program tu dipeda iya ulih dipandang ngagai orang luar iya nya bansa Dayak agi ngetanka adat asal diri empu,” ku iya rambau nutup Bazar Gawai Dayak Miri 2018 diatur Gagasan Anak Dayak Sarawak (GADS) ditu ensana.
Sama bisi datai Sekretari Politik Kepala Menteri Victor Temenggong, Ketuai Raban Bansa Iban Miri Pemancha Wilson Siang, Presiden GADS Vicky Gulin Shandom, Chairman Pengatur Pengawa, Ganda Anyum sereta temuai bukai.
Kaban Kunsil Nengeri (ADUN) Marudi nya madah, pengawa ngatur Bazar Gawai Dayak endang nyadi pelasar dikena bansa Dayak begempuru kelimpah mantu nyungkak penatai pemisi diri empu.
“Tu mega sebagi ari tuju kitai deka meda bansa Dayak nyingkang ke mua,’ ku iya seraya muji pemujur pengawa GADS ngatur Bazar Gawai Dayak empat taun bejurut.
“Beri puji enggau pengaga ati laban udah ngatur program Mantar Gawai enggau chukup richah sereta nerima sambut ke chukup manah nengah 45 bansa ke bisi ngambi bagi.
“Dikearap sukung enggau pengawa baka tu ulih ditampung ba program Bazar Gawai Dayak ba taun baru,” ku iya.
Bazar Gawai Dayak 2018 diatur bepun 2 Mei ngagai 26 Mei lalu nyadi program ninting taun dipasuk dalam dalam kalendar Miri May Fest 2018 nyerumba Taun Nemuai Ke Miri 2018.