Dato Sri Daniel Tajem nadai pagi kemari di Tabuan Jaya
KUCHING: Ex-Sapit Kepala Menteri Dato Sri Daniel Tajem ,82, nadai di rumah iya di Tabuan Jaya ditu urung jam 8 pagi kemari.
Anak tuai Tajem, Mervyn lebuh dikerandau madah penadai apai iya balat ngenyitka sida sebilik ketegal tudah nadai napi sakit ke raya.
“Apai semina bisi ngasai pedis punggung lalu bisi dianjung berubat ba klinik peribit dalam kandang seminggu tu.
“Enda ngadang nerima kangau telefon ari indai tumu pagi tu (pagi kemari) madahka apai enda ngeleda ba bilik tinduk.
“Aku ke diau di Samarahan begeguai pulai ke rumah kami di Tabuan Jaya. Raban orang ari sepital peribit ngenuku apai udah nadai,”ku Mervyn.
Tajem ada kena 15 March 1936 di Sungai Tanju, Samarahan lalu iya nyadi siku luyar ke tebilang kelebih agi ba pengawa negika hak rayat ba tanah NCR.
Pengudah nembuka pelajar sekondari ba sekula St Thomas di Kuching, Tajem nampung pelajar ba undangundang di Universiti Wellington, New Zealand lalu mujur bulih LLB.
Tajem nyadi Iban keterubah mangku pengawa luyar ba taun 1965.
Iya ngaul diri ba politik berengkah taun 1973 endur iya nyereta Sarawak National Party (SNAP).
Setaun udah nya, iya menang ba pengawa bepilih nengah tikit SNAP di sitak kunsil nengeri Lingga lalu mujur ngenanka penuduk nya ba taun 1979 enggau 1983.
Tajem dichiri nyadi Sapit Kepala Menteri kena 23 Mac 1981 nyentuk ngagai taun 1987 ke alai iya mega megai portfolio Menteri Betanam Betupi enggau Pemansang Menua Pesisir.
Pengudah ningkilka diri ari SNAP ketegal penyarut dalam parti nya, Tajem enggau ex-menteri ba Perintah Besai Tan Sri Leo Moggie lalu numbuhka Parti Bansa Dayak Sarawak (PBDS) ba taun 1983.
Ba taun 1996, Menteri Besai maya nya Tun Abdullah Ahmad Badawi nyiri Tajem nyadi Komisionner Malaysia di New Zealand nyentuk ngagai taun 2000.
Tajem ninggalka bini Datin Sri Ivy Tajem enggau tiga iku anak iya nya Mervyn, Raymond enggau Angeline sereta tujuh iku uchu.
Nitihka penerang Mervyn, pengawa nyenggai apai iya deka diatur kena malam Hari Dua (29 Mei) lalu deka disembiang di Gerija St Thomas jam 9 pagi 30 Mei sebedau dikubur di Nirvana Memorial Park di Bau ba hari ke sama.