Mensia mayuh dipinta besabar, beri awak PH ngamatka semaya

KANOWIT: Chairman Parti Keadilan Rakyat ( PKR) Sarawak, Baru Bian minta mensia mayuh besabar lalu meri awak ngagai Perintah Pakatan Harapan (PH) ngamatka semaya ungkup pengawa bepilih tu tadi.

Iya madah semaya nya nyangka deka ngambi timpuh ke panjai mimit laban PH benung ngubah gaya kediatu, langkar sereta chara bejalaika pengawa Perintah baka kediatu.

“Pemenang baru berengkah. Kami beterima kasih taja pan kami alah di Kanowit tang kami menang di Selangau, tang ke pengabis berat, iya nya kitai mujur ngambi Putrajaya.

“Tu ke berat laban kuasa politik diatu ba jari kami ( PH),” ku Baru madah lebuh bejaku ngepunka pengawa mantar gawai sereta gempuru meri terima kasih, ti digaga di rumah chairman PKR Kanowit, Thomas Laja Besi di Hui Seng Garden ditu, kena malam hari Enam minggu nyin tadi.

Baru ti mega nyadi Kaban Kunsil Nengeri (ADUN) Ba Kelalan sereta Kaban Parlimen (MP) Selangau, sebedau tu meri jamin ngagai rayat, iya nya perintah baru deka masa semua semaya sida iya baka ke dipadah maya PRU14 tu tadi.

Iya madah, ketuai ‘de-factor’ PKR, Datuk Seri Anwar Ibrahim bisi udah netapka pekara tu maya di tebiu ulih surat berita, Oriental Daily, minggu nyin tadi.

Baru nandu baru madahka iya pechaya Sarawak deka diberi peluang, nyadi pengari rayat ba rintai kabinet tu ila. “Ketuai pemesai di PH udah napi bemacham bansa empas,pengawa jai ke digaga ulih perintah sebedau tu ke ngenggaika penyakal nyengkaum napi Perintah ke mangah (perintah sebedau tu).

“Nya alai, aku pechaya PH deka ngaga pengawa sida iya ke pengabis manah ke rayat di Sarawak sereta menua,” ku iya.

Baru mega ngelalau bala bakih iya ke megai perintah, anang sesekali salah kena kuasa sida iya, baka ke kala digaga perintah sebedau tu.

Bekaul enggau pekara nya mega, Baru mega ngelaluka barang sapa ke deka enggau ‘perau’ sida iya, lalu ngenegapka agi pemerat pengawa sida iya.

“Pemerat tuju kami dalam politik, iya nya ke mensia mayuh beserakup enggau kami dalam perampa enggau pengawa kami, ngemansangka Malaysia baru enggau polisi ke deka meri penguntung ngagai mensia mayuh,” ku iya.

Sama bisi enggau ngulu atur pengawa nya kemari, sekretari PKR Kanowit, George Chen enggau chalun PKR ke sitak Kanowit maya PRU14, Satu Anchom.