Perintah nyukung juluk SDNU Sibu deka numbuhka Rumah Dayak
SIBU: Perintah nengeri besedia meri sukung ngagai Gerempung Dayak Sarawak (SDNU) Sibu ti deka numbuhka Rumah Dayak ba mengeri tu.
Sapit Kepala Menteri Datuk Amar Douglas Uggah Embas madah, sukung tu bela nyengkaum saup ari belanja tauka sukung ke bukai ti bekaul enggau pengawa nya.
“Juluk ati deka bisi Rumah Dayak di Sibu endang udah lama kenyau ari aku ke gawa ditu dalam taun 1977 tauka 1976 suba.
“Nya alai, aku ditu besedia deka nyaup kita ngambika juluk ati kita ti deka bisi Rumah Dayak tau nyadi nyata udah tu,” pia ku iya madah.
Iya mantaika jaku tu maya bejadi Pengerami Mantar Gawai Dayak Sibu 2018 ba Dewan Suarah Sibu ditu, malam kilah ensana.
Bela datai enggau ngulu pengawa nya, bini Uggah, Datin Amar Doreen Mayang, Menteri Muda Pelajar enggau Pemansik Sains Dr Annuar Rapaee, Sekretari Mendam Opis Perengka Guna Dato Ir Alice Jawan, Kaban Kunsil Nengeri (ADUN) Bukit Goram Jefferson Jamit, ADUN Dudong Datuk Tiong Thai King, tiga iku Sekretari Politik Kepala Menteri Romeo Christopher Tegong, Petrus Igat enggau Daniel Bujal, Chairman Komiti Pengerami ti mega Chairman SDNU Sibu Chambai Lindong sereta Temenggong Stanley Geramong.
Taja pia, nambahka jaku iya, Uggah minta bala raban SDNU Sibu ngemeratka pengeransing diri enggau tuju ti deka numbuhka Rumah Dayak ba ditu.
“Kebuah pia laban di Kuch- ing kitai udah bisi Rumah Dayak tang kitai bela nemu nama penyadi udah nya.
“Aku meseti ngelalau bala komiti SDNU ditu ngambika kita fokus enggau tuju pengawa ngaga Rumah Dayak tu,” ku iya madah baru.
Ba pekara bukai, Uggah mega madahka sebengkah forum tauka simposium deka diatur belabuh ari bulai Julai ti deka datai.
Ku iya, forum nya nyadika platform alai berati sereta berandauka kini kuing rayat nengeri tu manggai taun 2030.
“Kitai ngembuan juluk ati deka datai ba tikas manah agi ngambika kitai enda tinggal bela bepenatai pemisi ke tinggi ba taun 2030.
“Nadai orang ulih mantah nama tikas kitai ke diatu tang kitai deka ba tikas ke chukup manah maya 2030 ngambika semua kitai bansa Dayak lebih agi bansa Iban nyengkaum Melayu ba nengeri tu sama baka orang bukai ngembuan penatai pemisi ti tinggi.
“Forum tu beguna dikena berandau sereta nugung penemu enggau pangan diri seririh enggau perintah nengeri ti betuaika Kepala Menteri Datuk Amar Abang Johari Tun Openg semampai deka mendingka penemu rayat,” pia ku iya madah baru.
Ba pengerami nya Uggah bela muji pengawa SDNU Sibu ti ngungkupka belanja dikena meri peransang pelajar ngagai nembiak ke bulih pemutus peresa perintah ke manah.
Ketegal nya mega, iya deka meri RM10,000 nyaup peransang pelajar nya.
Kelimpah ari nya, iya bela meri RM30,000 ngagai komiti pengerami nya enggau RM10,000 ngagai Kelab Gagong Sarawak.