Ulah mensia mayuh ti meri coklat ngagai polis dibasa
KUCHING: Raban polis di sekeda palan polis di bandaraya tu bedau lama tu tadi, tekenyit nerima coklat ke dianjung mensia mayuh ngagai sida iya.
Pengawa ke digaga pemeri ari mensia mayuh, siti pengawa ‘Jom Bagi Coklat Kat Abang dan Akak Polis #chocs4cops’ dipungkal di Kuala Lumpur ulih siku luyar ti mega nyadi siku aktivis, Siti Kasim sereta ex-pengarang berita, Sidek Kamiso.
Pengawa tu nyadi timbal ngagai ex- Menteri Besai, Datuk Seri Najib Tun Razak ke kala ngeripot ( nengah luyar iya) raban polis ke meresa sereta ngabas ngenyit rumah iya maya nya, makai sereta ngambika diri coklat ke disimpan dalam petis ais di rumah nya bedau lama tu tadi.
Bekaul enggau pengawa ke merindang raban polis di mengeri tu, Hari Enam tu tadi, siku arkitek, Min Wee enggau bini iya, Samantha Yap sereta anak seduai iya, Sean Wee ngetu di Palan Polis Sentral, lalu nyuaka coklat ngagai bala polis ke benung gawa maya nya.
Lebuh ditanya ngagai sida menyanak, kebuah sida iya ngaga pengawa bansa nya, ku Wee, sida sebilik ransing endar ati.
“Tu siti pengawa ke manah ke patut digaga lalu semua orang ngaga pengawa tu di serata menua Malaysia ( nganjung coklat ngagai palan polis). Kami enggau sarawak kena tinggal,” ku Min Wee.
Ku iya nandu, utai ke matak ati ba pengawa nganjung coklat tu, bala pangan sida iya muji penemu nya lalu bela meli coklat.
“Mensia mayuh enda bekira lalu sanggup meli coklat, meri ngagai raban polis,” ku iya.
Keterubah iya, sida pega- wai polis ke gawa ba Balai Polis Senteral enggai nerima pemeri nya, tang udah mendingka penerang ari temuai tu, baru sida iya nemu tuju nganjung coklat ngagai Palan polis.
Sida ke nerima coklat nya ujung minggu nyin tadi, Korporal Nurul Bashirah Abdullah enggau Korporal Irwan Shah Abdullah.
Naka tu, urung 3,000 pengguna Facebook mandangka pengeransing ati enggau ngulu lama berita Facebook nya, lalu merambu deka ngerembaika penemu nyendiaka coklat nya datai ngagai hari Enam tu ila, ngambika mayuh agi palan polis ke nerima coklat ari mensia mayuh.
Di Kuching, mensia mayuh mega enggau ngulu nengah laman berita Facebook nya madahka sida ita nganjung coklat ngagai Palan Polis Sekama, Sungai Maong, Simpang Tiga, Gita enggau Batu 7.