Valerie Michelle menggi gelar Kumang Gawai Dayak Sibu 2018
SIBU: Gelar Kumang Gawai Dayak Sibu diempu Valerie Michelle Alli maya Pengerami Mantar Gawai Dayak Sibu 2018 ba Dewan Suarah Sibu ditu, malam ensana.
Indu dara, 19, ari Sungai Ranan, Kanowit tu mujur madamka juluk ati semilan iku pemekit ke bukai megai gelar nya.
Enggau tu, Valerie ti agi besekula tu mai perais mata duit RM1,500, trofi, hamper, selampai enggau jumpang.
Gelar Lulong Gawai Dayak Sibu maya tu diempu Terrina Rosser Mujah, 20, ari Mukah.
Iya ke gawa nyadi sekretari mai perais mata duit RM1,200, trofi, hamper enggau selampai.
Wati Assan, 20, peranak Sungai Lengan, Sibu ba pekit tu mai pulai gelar Selinggar Matahari Gawai Dayak Sibu.
Pemekit tu ti agi benung belajar mai perais mata duit RM1,000, trofi, hamper enggau selampai.
Penuduk lumur empat enggau lumur lima diempu Rebecca Jane Jemeb, 18, ari Kampung Bahagia Jaya, Teku enggau Christina Ringgit, 26, ari Sungai Sengan.
Seduai maya tu mai perais RM300 enggau RM250 sereta disempulang enggau selampai.
Lima iku pemekit ke bukai maya tu iya nya Cinderella Simong, 18, ari Tanjung Penasu, Mcqueen Menti Entry, 23 (Machan, Kanowit), Sharon Mathew, 24 (Kanowit), Florence Jega Jungan, 20, (Sungai Arip, Selangau) enggau Maliyana Maradi, 19 (Jalai Kemuyang) lalu bela mai perais sagu ati RM150 siku.
Ba kategori bukai, Kategori Model Fesyen Terbaik enggau Kumang Gawai Pilihan diempu Christina lalu Sharon ngempu Kategori Peserta Paling Popular dan Pertuturan Terbaik.
Perais sida tu disuaka Sekretari Besai Gerempung Dayak Sarawak (SDNU) ti mega Sekretari Mendam Opis Menteri Perengka Guna Dato Ir Alice Jawan.
Bela nyempulang iya maya tu iya nya Chairperson Serakup Indu Dayak Sarawak (SIDS) Sibu Angelyn Uchi Maseng.
Pengerami Mantar Gawai Dayak Sibu 2018 dipenyadi Sapit Kepala Menteri Datuk Amar Douglas Uggah Embas enggau bini iya Datin Amar Doreen Mayang.