SCCS deka terus ngatur program ‘Go Bald’ kelai nyukung pesakit riman
BINTULU: Gerempung Riman Nembiak Mit Nengeri Sarawak (SCCS) deka terus ngatur pengawa nengah program ngundulka pala tauka ‘Go Bald’ dikena ngumpul wang turu ungkup mantu sereta nyukung ruang bilik sida ti sakit riman di nengeri tu.
Presiden SCCS Jocelyn Hee madahka, kelimpah ari ngumpul wang turu, program nya mega ngembuan batang tuju ti nyata nengah pengeransing kami ngagai sida ti napi penyakit riman.
“Sida enda kediri lebuh ti napi penyakit tu lalu aku saritu chukup siru meda sekeda apai indai ditu mega sama enggau ngundulka pala sereta raban dalam ruang bilik sida ke bukai, kelai meri sukung ngagai raban nembiak mit ke napi penyakit riman tu,” ku iya bejaku lebuh ti bejadika Program ‘Go Bald 2018’ ba TImes Square Megamall ditu, pagi kemari.
Jocelyn madah, pejalai tu ukai siti pekara ti muntang ke ngira pengelelak ari sukut emosyen, fizikal, runding enggau duit tang nengah sukung begulai, SCCS deka ulih neruska pengawa dikena nyediaka pengawa ngintu ti pemadu manah sereta meri sukung ngagai kaban sebilik pesakit nya.
Iya madahka, kami deka terus nyingkang ke mua, nyukung enggau bekerejasama rat begulai enggau gerempung meri sukung ngagai pesakit riman ke bukai di menua tu nengah pengawa bekunsika pekara pemun sereta ngaga pengawa ti manah mantu ruang bilik pesakit ti napi penyakit riman di Malaysia.
Beserimbai enggau nya, pengawa ngatur program ngundulka pala tu enda mujur nyema nadai sukung ari mayuh piak nyengkaum bantu volunteer dalam program tu.
“Aku deka meri besai terima kasih ngagai TImes Square Megamall ke udah nyediaka palan endur ngatur program bansa tu pia mega mayuh piak bukai nyengkaum raban volunteer Bintulu enggau Miri ti udah chakah nentuka program tu mujur dipejalai,” ku iya.
Ku iya nandu, program ngundulka pala tu dipunka kenyau 10 tahun ti udah ke mai batang tuju meri penyedar seraya meri sukung ari sukut emosyen ngagai pesakit riman di Sarawak seraya maya nya mega ngumpul wang turu dikena nyukung aktiviti enggau servis kami mantu sida ke napi penyakit riman.
“TImpuh 10 taun sepengudah tu, program kami udah meri bantu pukul rata 60 peratus ari belanja ninting taun kami iya nya RM1.5 juta nengah servis kami ti nyaup urung 1,100 buah ruang bilik semua nya di Kuching ba taun 2003 lalu ba Miri 2016,” ku iya nandu.