SDNU pampang Sibu randaka projek Rumah Dayak mujur digaga
SIBU: Gerempung Dayak Sarawak (SDNU) Sibu ransing deka meda projek Rumah Dayak mujur digaga udah tu ila di Sibu ditu.
Chairman SDNU Sibu Chambai Lindong madah, sebengkah aum deka diatur dulu beratika perambu ngaga rumah nya sebedau dibantai ngagai indu opis SDNU di Kuching.
“Beberapa taun ke udah kitai kala begumpulka belanja ti deka dikena ngaga Rumah Dayak.
“Tanah kitai udah bisi ba Jalai Padang Bilun Lama tang komiti ke diatu ke dipegai aku udah tu ila kami naka ulih bejalai ngatur awakka juluk ati kitai deka ngaga rumah dipenyadi,” pia ku iya madah maya Pengerami Mantar Gawai Dayak Sibu 2018 ba Dewan Suarah Sibu ditu, malam kilah ensana.
Pengerami nya dipenyadi Sapit Kepala Menteri Datuk Amar Douglas Uggah Embas.
Chambai madah, duit ke udah digumpul suba endang agi bisi kelimpah komiti sida udah ngaga perambu deka meli rumah kedai.
“Penyampau berapa digumpul tau ditemu kita maya Aum Besai Ninting Taun (AGM) kelimpah penatai kita ba aum nya beguna ngambika nemu nama pengawa enggau program deka dipejalai kitai,” ku iya madah baru.
Kelimpah ari nya, Chambai mega madah, nangkan taun tu, sida merambu deka ngaga siti agi kategori dikena meri peransang ngagai nembiak ti ngembuan pengelandik ba teknikal.
Iya madah, bisi nembiak enda mujur ba peresa tang bisi pengelandik teknikal ti patut diberi peransang baka peransang pelajar ke diberi ngagai nembiak ti bulih peresa ke manah ngelama tu.
“Berengkah ari diatu tauka taun udah tu SDNU Sibu bela ngungkupka peransang pelajar ngagai nembiak bepengelandik teknikal.
“Tuju kitai meri peransang ngambika bala bukai, bala menyadi, kaban belayan nyengkaum apai indai bela teperansang, betunda bulih pemujur ba pelajar,” pia ku iya madah.
Bekenangka penatai lebih 1,000 mensia mayuh ba pengerami nya, ku Chambai nya mandangka bansa Dayak ulih begulai enggau pangan diri.
“Kitai ba Sibu ditu baka ke datai ba pengerami tu asal iya enda sala baik nya ari ili, ulu, jauh tauka semak.
“Tang laban kitai ti deka begulai enggau pangan diri sebedau mulai kediri ke menua ngintu Gawai, kitai ulih betugung enda ngira ari ni, chara idup, politik tauka pekara bukai.
“Tu nyadika pekara ti dikemegahka kitai bansa, ulih begulai nengah gerempung,” ku iya madah.
Kelimpah nyuaka peransang pelajar, program ke bukai maya pengerami tu iya nya baka Pekit Kumang, Panggau Pemerindang eng- gau Program Mandangka Main Asal.
Sama datai ngerichah pengerami maya tu iya nya bini Uggah, Datin Amar Doreen Mayang, Menteri Muda Pelajar enggau Pemansik Sains Dr Annuar Rapaee, Sekretari Mendam Opis Perengka Guna Dato Ir Alice Jawan, Kaban Kunsil Nengeri (ADUN) Bukit Goram Jefferson Jamit, ADUN Dudong Datuk Tiong Thai King, tiga iku Sekretari Politik Kepala Menteri Romeo Christopher Tegong, Petrus Igat enggau Daniel Bujal, sereta Temeng-