Abas ngenyit deka dipajakka polis enda ngira maya ngemunaska pengawa bejudi
KUCHING: Pengawa nagang pengawa bemain judi dipajakka lebuh polis mujur ngabas ngenyit 71 iku orang dalam 54 abas ngenyit ti bisi digaga di 17 buah sitak di menua tu.
Ketuai Opis Tasat Pengawa Salah Sarawak SAC Denis Leong Soon Kuai madah, abas ngenyit nya digaga kena 28 Mei datai ngagai 3 Jun tu tadi, lalu mungkur sitak menua Kuching, Padawan, Kota Samarahan, Miri, Sibu, Bau, Mukah, Bintulu, Sri Aman, Limbang, Saratok, Matu Daro, Lundu, Song, Maradong, Marudi enggau Sarikei.
Iya madah, abas ngenyit sereta pengawa nangkap sida ke bemain judi digaga atas penyalah pengawa judi loteri ke ditagang (haram) tauka 4D, judi siber enggau judi ‘haram’.
“Operasi ke dipajakka ba judi loteri ‘haram’ enggau judi siber ti digaga ari 28 Mei ngagai 3 Jun tu tadi, urung 54 abas ngenyit digaga di 17 sitak menua di serata menua tu.
“Dalam abas ngenyit nya, urung 79 iku orang ditangkap, berumur 17 ngagai 63 taun,” ku iya madah nengah siti penerang ditu, kemari.
Lebuh bejaku pasal abas ngenyit nya enggau silik agi, Denis madah 33 ari nya bekait enggau judi loteri ‘haram’ 4D, 17 abas ngenyit mega digaga mungkur penyalah judi siber lalu empat abas ngenyit bukai bekait enggau judi ‘haram’.
Iya nandu baru madahka, dalam abas ngenyit nya, polis mega ngerampas urung RM263,730 wang, 19 talipaun binching, dua buah komputer, dua set main judi holo, slip kena betaruh sereta sekeda perengka guna.
Bepelasarka sida ke kena tangkap nya, ditan sereta ditasat nengah genteran tusun ukum ‘Akta Rumah Judi Terbuka 1953’.