Doris: Penetap gaji minimum baru meseti dititihka pengaji Laban belanja pengidup majak besai lalu orang ti gawa ngembuan penatai pemisi ke mit idup napi pemar ninting hari
KUCHING: Pengaji meseti nitihka penyampau gaji minimum ti baru maya perintah Pakatan Harapan (PH) bejalaika iya, pia ku Ketuai Indu Parti Rakyat Sarawak ( PRS) Doris Sophia Brodie.
Kebuah pia laban belanja idup mega majak niki ngelama tu lalu idup deka napi pemar ninting hari ngagai sida ti bekereja enggau penatai pemisi baruh.
Diatu, di Semenanjung Malaysia gaji minimum iya nya RM1000 lalu di Sarawak enggau Sabah iya nya RM920.
Ku Doris, iya muji perintah PH ungkup perambu pelin sida ke bukai ba Manifesto bepilih gempung sida, nikika penyampau gaji minimum ngagai RM1500.
“Aku pechaya penyampau gaji minimum baru ti diperambu mega dipuji lalu dikeingin sida ti bekereja di kedai kupi enggau supermarket nyengkaum ti bekereja ba kebun bedandang besai ke bukai,” ku iya.
Gaji ke ditiki tu patut laban deka mantu nampung belanja
Aku pechaya penyampau gaji minimum baru ti diperambu mega dipuji lalu dikeingin sida ti bekereja di kedai kupi enggau supermarket nyengkaum ti bekereja ba kebun bedandang besai ke bukai. Doris Sophia Brodie Ketuai Indu Parti Rakyat Sarawak
pengidup ke tinggi dalam kandang mengeri, ku iya meri kebuah.
“Maya penyampau gaji minimum tu dipejalai, aku endang ngarapka bala pengaji deka mayar gaji pekerejasa sida nitihka pematut ba penyampau ke baru.”
“Ba semengat pengelurus baka pengawa dikemeranka perintah besai PH, raban bekuasa bekaul mega meseti bejalaika pengawa sida nentuka bala pengaji enda salah nguna sistem nya lalu bala pekereja mega meseti nemu hak sida dibayar gaji nitihka pematut,” ku Doris lebuhka dikerandau apin lama ke udah.
Bala sida (pekereja) ulih mantaika sebana ngagai opis bekuasa bekaul nyema pengaji sida enda nitihka atur nya, ku iya nambah.
Doris mega beratika bisi mayuh kedai kupi di mengeri tutup beberapa hari ke udah (maya Gawai).
“Aku melabaka laban pekereja sida tebal agi bansa Dayak. Maya Gawai, pekereja bansa Dayak deka mulaika diri ke menua tauka rumah panjai ngintu pengerami Gawai, nya kebuah pengempu kedai kupi nutup kedai sida ketegal nadai orang gawa,” ku iya.
Sekretari Politik Kepala Menteri nya madah, beberapa taun deka datai kelebih agi maya Jalai Besai Pan Borneo, Jalai Tebing Tasik enggau Jalai Besai Kedua udah tembu, mayuh agi sida ke diau di menua pesisir kelebih agi bala nembiak deka pansut ngagai mengeri bekereja.
“Aku ukai semina bejaku pasal kereja ba kedai kupi aja, tang mega ba kilang enggau industri enggau pekara ke bukai. Tu deka nyadi ubah ti narit ati.”