KPDNKK: 22,834 premis udah diperesa ari 1 Jan-5 Jun 2018

KUCHING: Bagi Peneritadat Opis Menteri Dagang Dalam Negeri, Koperasi enggau Pekara Bebeli Barang (KPDNKK) Negeri Sarawak dalam timpuh 1 Januari ngagai 5 Jun 2018 udah meresa 22,834 buah premis serata nengeri tu.

Direktor KPDNKK Nengeri Sarawak, Datuk Stanley Tan madah, pengawa meresa nya dipejalaika nitihka semua akta ari baruh Bagi Peneritadat Opis Menteri nya.

“KPDNKK Nengeri Sarawak udah meresa 22,834 buah premis nyengkaum 19,751 di mengeri enggau 3,083 buah premis di menua pesisir.

“Lalu penyampau Kes Ke Siambir Atur bisi 183 iti lalu penyampau rega dirampas RM324,016.70 enggau penyampau rega kompaun RM20,000,” ku iya madah ngagai raban pengarang berita.

Dulu ari nya, Stanley disempulang Sapit Direktor ti mega Ketuai Pemesai Peneritadat Negeri KPDNKK Nengeri Sarawak Md. Nawawi Ab Rahman enggau Penulung Direktor Opis Kastam (Bagi GST) Spree Awang Morshidi meresa sereta matau rega barang nengah Operasyen Catut 4.0 ubah chukai barang enggau servis (GST) ari 6 peratus ngagai 0% ke diatur ba palan bebeli barang Everrise, Vivacity ditu, kemari.

Operasyen diatur begulai enggau Opis Kastam Diraja Malaysia nya kemari, mega sama disempulang Menijar Everrise, Pampang Vivacity, Jessie Hee.

KPNDKK Nengeri Sarawak bisi 9 pampang sereta bisi urung 200 iku raban peneritadat di serata nengeri tu.

Nitihku Stanley, sepenyampau 183 kes nya mungkur 8 Akta ari baruh Bagi Peneritadat KPDNKK Nengeri Sarawak.

“Ari 183 kes nya nyengkaum 62 kes ‘Akta Kawalan Harga & Anti Pencatutan’ lalu penyampau rega dirampas RM7,029.05 enggau penyampau kompaun RM7,900; nambahka nya Akta Kawalan Bekalan 1961 (12 kes); Akta Perihal Dagangan 2011 (36 kes); Akta Timbang & Sukat 1972 (79 kes); Akta Perlindungan Penggunaan 1999 (2 kes) sereta tiga akta kebukai nadai ngerikut sebarang kes iya nya Akta Hak cipta 1987, Akta Sewa Beli 1967 enggau Akta Jualan Langsung & Skim Anti Piramid 1993,” ku iya.

Kelimpah ari nya lebuh ke ngenang pasal rega barang ke dijaga perintah nyerumba pengerami Hari Raya Aidilfitri taun tu, iya madah barang ke diguna tiap hari disadang chukup.

“Bekal barang baka gula, beras, minyak sumai enggau ke bukai bepelasarka pengawa meresa ke dipejalaika nyerumba Hari Raya, bekal nya di Sarawak chukup.

“Nyema suntuk bekal, kami deka bebendar ngiga bekal ari pemekal ke bisi,” ku iya seraya madahka pengawa nyaga barang nyerumba Hari Raya deka dipenyadika enda lama agi.