KPDNKK S’wak nerima 47 sebana bekaul GST

KUCHING: Opis Menteri Dagang Dalam Nengeri, Koperasi enggau Pekara Bebeli Barang (KPDNKK) Nengeri Sarawak bisi nerima 47 iti sebana ari serata nengeri bekaul enggau ‘ Anti Pencatutan’ tauka Chukai Barang enggau Servis (GST).

Direktor KPDNKK Nengeri Sarawak Datuk Stanley Tan, madahka semua sebana nya diterima berengkah 1 Jun 2018 nyentuk ke diatu (kemari).

“Penyampau 47 iti sebana ari serata Sarawak nya nyengkaum 19 nengah Aplikasyen EZadu, 11 (website eaduan KPDNKK), 5 (jalai bukai), 9 nengah Bilik Operasyen KPDNKK Kuching enggau 3 viral.

“Kategori sebana nya 26 sebana bekaul enggau Pekara Rega sereta 21 bekaul enggau Pekara GST.

“Bisi 12 iti sebana mujur diputarka, lalu bisi 30 iti sebana agi benung ditasat sereta lima iti sebana diserahka nga- gai Opis Kastam,” ku iya.

Dulu ari nya, Stanley bejalaika Pengawa Meresa sereta Matau Operasyen Catut 4.0 Ubah GST ari 6 peratus ngagai 0 peratus ba palan bebeli bebeli barang Everrise, Vivacity Megamall ditu, kemari.

Lebuh ke ngenang pasal Operasyen Catut 4.0, iya madahka operasyen nya dipejalaika begulai enggau Opis Kastam berengkah 24 Mei 2018 ti diatur di serata nengeri.

Opis nya ngumpul sereta meresa rega semua bansa dagang nyengkaum palan besai bebeli barang, kedai kereban telekomunikasyen, mini market, restoran, kedai renchit, kedai makai enggau ngirup, kedai perabot enggau ke bukai.

Tuju pengawa meresa nengah operasyen tu dipejalaika dikena ngenukuka orang dagang ke berejista enggau Opis Kastam Diraja Malaysia - JKDM (Opis Kastam) ngemata semua penyampau chukai barang enggau servis pengudah penyampau diubah ari 6 peratus ngagai 0 peratus.

Tu dikena nyeliahka ari orang dagang ngelakar ba rega ketegal ubah chukai, lalu dikena ngenukuka juluk 0 peratus GST, KPDNKK begunaka saup mensia mayuh nyadi mata enggau pending.

“Naka ke diatu 0 peratus GST bisi kerejasama ti manah ari orang dagang, lalu nyema bisi orang dagang ke agi ngengkahka 6 peratus sida patut nurunka nya.

“Kami minta saup mensia mayuh ngambika ngenataika sebana tauka ngeripot ngagai KPDNKK nyema bisi nemu orang dagang ti agi bisi ngengkahka GST 6 peratus.

“Aku ngarapka sebana nya digaga nengah chara rasmi baka nengah website eaduan KPDNKK, Bilik Operasyen KPDNKK, lumur 03-8000 8000 1Malaysia One Call Centre ( 1MOCC), lumur Nadai tol 1- 800- 886- 800 tauka emel ngagai e-aduan@ kpdnkk.gov.my, lalu anang ngerembaika berita bula,” ku iya.

Lebuh ke dipinta ngenang pasal ukum orang dagang ti ngelanggar ‘Akta Kawalan Harga dan antipencatutan 2011’, Stanley madahka ulih ditinggang penalti baka enti gempung gerempung tau diukum enda lebih ari RM100,000 lalu penyalah ti kedua kali enggau ke udah nya deka diukum enda lebih ari RM250,000.

Tauka enti ukai gempung gerempung, tau diukum enda ngelui ari RM50,000 tauka dijil pengelama enda lebih ari dua taun tauka kededua nya, lalu salah kedua kali tau diukum enda lebih RM100,000 tauka dijil dalam timpuh enda lebih ari 5 taun tauka kededua nya.

Nyempulang Stanley meresa sereta matau rega barang nengah Operasyen Catut 4.0 kemari, Sapit Direktor ti mega Ketuai Pemesai Peneritadat Nengeri KPDNKK Nengeri Sarawak, Md. Nawawi Ab Rahman enggau Penulung Direktor Opis Kastam (Bagi GST) Spree Awang Morshidi sereta Menijar Everrise, Pampang Vivacity, Jessie Hee.