Baru tekenyit pengudah nemu kebuah Opis Pengerai Lawas dikerepau pengempu premis
KUCHING: Kaban Kunsil Nengeri (ADUN) Ba’Kelalan Baru Bian madahka diri tekenyit sereta asa pengudah nemu Opis Pengerai Lawas dikerepau pengempu premis ketegal enda mayar suwa pengelama 30 bulan.
“Pekara nya tebantai ke alai gaya enggau Sepital Lawas bedau dibantaika amat. Utang ke enda dibayar 30 bulan udah kelalu lama lalu aku alit ati meda pengeliat ati pengempu premis nganti kelalu lama baka nya.
“Pekara ‘Sempekat enggau pengilap surat’ ti dipadah Pemesai Pengerai Pelilih Lawas enda ulih diterima nyadi kebuah ti patut, laban enda ulih melabaka penanggul ke baka nya diteju pia aja enda diputar nyauka manggai tiga taun,” ku iya ba penerang berita kemari.
Baru, ti mega Kaban Parlimen (MP) Selangau, madahka iya berasai lantang ati laban Direktor Pengerai Sarawak, Dr Jamilah Hashim udah nimbal enggau sekeda penerang pasal utang bayar ti bedau dibayar nya.
“Sepital baru Lawas baru udah dibalut penanggul lalu dilanjar kenyau ari perintah ngemendarka belanja sepenyampau RM121 juta ungkup pengawa ngaga nya dalam taun 2011, ti dipelaba tembu digaga dalam timpuh tiga taun.
“Kitai enda ulih mantu tang nembuka pengilap atur perintah ke dulu ba pemansut ti ngujungka penanggul tu nyadi ba Lawas. Kitai udah ninga baka ni sepital mensia mayuh enda chukup belanja dikena meli bekal ubat ti chukup, nya alai kami enda tekenyit bisi penanggul enda chukup belanja dikena mayar suwa.”
Ku Baru, iya udah madahka nya dalam Aum Kunsil Nengeri (DUN) ba taun 2013 ke alai suwa ungkup empat lot kedai sepital sementara iya nya RM23,000 sebulan.
“Nya deka pulaika pemanah Pemesai Pengerai meri jamin ngagai mensia mayuh ke alai bayar suwa ungkup lot kedai nya dikemaru.”
Nitih ku iya, peranak Lawas udah kelalu lama enda disikap enggau perengkaguna pengerai, enggau alternatif sepital ti jauh di Miri enggau Kota Kinabalu.
“Endang nyata nadai pematut perintah ke dulu ngemendarka pekara tu nyadi ba timpuh kelalu panjai.”
“Perintah baru mayuh kereja dikena ‘nuchi pengamah’ ke digaga Barisan Nasional (BN), ku Baru, pengudah iya nemu nyengala agi sentang penanggul ti nyadi ba sepital sementara Lawas sereta pengawa ngaga sepital baru, iya deka bebendar mai pekara nya dikerandau enggau Menteri Pengerai.