Siti ari sepuluh semaya dalam Manifesto Pakatan Harapan udah dikeamat
MIRI: Perintah Besai Pakatan Harapan (PH) udah ngamatka siti ari sepuluh semaya dalam Manifesto pengawa bepilih PRU14 sida ngambika kusung GST, lalu semua nya nyadi dalam timpuh tiga minggu pengudah Menteri Besai Tun Mahathir Mohamad madahka nadai agi GST berengkah ari 1 Jun taun tu.
Kaban Kunsil Nengeri ( ADUN) Pujut Dr. Ting Tiong Choon madah, diatu rayat ngasaika tating ti nepan sida beberapa taun ke udah udah lempung laban Nadai Agi GST ke alai rega pemakai enggau barang bukai nadai agi ditambah enam peratus.
“Tu siti ari isu besai, Nadai Agi GST, ke alai rayat nyukung PH maya pengawa bepilih dikena nentuka nadai agi tating tambah ditapi komuniti,” ku Dr. Ting madah ngagai The Borneo Post lebuh ngabas outlet Imperial Mall Boulevard di Miri, ngalihari kemari.
Sama bisi enggau Ketuai Nembiak DAP Miri, Peter Hii enggau Menijar Operasyen sereta Dagang Boulevard Hypermarket and Departmental Store Sdn Bhd Imperial Mall and Boulevard Shopping Complex, Alan Lee Chee Leong.
Nitih ku Ting, tu siti ari isu besai maya PH bekimpin ba pengawa bepilih ngambi ngemunaska GST.
Ku iya, tu mega nyadi siti ari isu rayat enggau mensia mayuh ti ngasuh peranak Malaysia enggau di Sarawak irau ke alai perintah ke dulu bejalaika enam peratus GST ba semua dagang produk enggau barang nyengkaum pemakai.
Ting nyemetak madah, pengudah perintah besai PH ngambi penuduk ari perintah BN ke sebedau tu, lebuh ‘mandat’ diberi rayat, udah ngemunaska GST tekala nya, berengkah ari 1 Jun 2018 ti diputuska Tun Mahathir.
Ku iya nandu, polisi perin- tah PH ngemunaska GST dikena nentuka rayat badu agi ditating mayar lebih lebuh bebelika semua produk ti dijual.
“Nadai agi GST dibantaika perintah besai PH ungkup mensia mayuh meseti dititihka komuniti dagang di Malaysia nyengkaum di Miri,” ku iya madah pengudah ngabas Boulevard Hypermarket sereta beratika barang ti dijual nadai chukai enam peratus GST.
Nyemetak madahka Nadai Agi GST, iya ngarapka semua komuniti dagang deka nyukung polisi perintah PH lalu ba timpuh panjai ekonomi Malaysia deka ngerembai.
Berebak enggau nya, iya madahka bisi sekeda orang dagang sebana kelalu mayuh kelikuh nukar rega GST ba premis sida, ke alai iya madahka mayuh premis dagang ngubah dalam kandang dua minggu ke udah sereta nadai penanggul laban semua dalam sistem enggau komputer.
Nerima timbal ari pedagang di Miri ditu, ku iya, beberapa hari ke udah bisi diripot penyampau sida ti bebelika produk enggau barang nambah laban rega mudah agi.
Ku iya, bela bisi pen- guntung ngagai pedagang, pemekal laban mayuh orang datai bebelika barang ba kedai enggau premis sida lalu sida ulih nambahka penyampau produk ti dijual sida.
Seraya, Alan Lee madahka semua rega ti dijual ba ketetiga outlet sida di Imperial Mall, Boulevard Pujut enggau sebuah di Sabah udah dijual enggau nadai GST kenyau ari 1 Jun.
Ku iya, sida udah ngubah kad rega ba kedai besai, taja pia, barang baka baju enggau gari begunaka timpuh dikena ngubah kad rega lebuh mayar ba kaunter bayar laban semua GST udah ubah ngagai kusung peratus.
“Dagang manah laban mensia mayuh ulih bebelanja mayuh agi kelebih agi maya hari besai laban rega barang ke dijual nya kurang enam peratus ari sebarang GST,” ku iya nerang silik.