SUPP nadai penanggul Tommy Thomas dipilih nyadi AG baru Malaysia

KUCHING: Nuduh Tommy Thomas mangku pengawa nyadi Peguam Negara ( luyar menua Malaysia tauka AG) ke baru ukai penanggul ba Parti Sa’ati Rayat Sarawak (SUPP) lebuh luyar veteran nya terang udah nitihka pemerat ti kedeka menua Malaysia ba seiku luyar ke bepeneleba ngemutarka undang- undang di Malaysia.

Ku Ketuai Pemuda Indu Opis SUPP, Michael Tiang, piak bekuasa ke patut semina berundingka penau seiku- seiku chalun Peguam Negara bepelasarka empat sukut batang empekat kena ngenudukka Perintah Menua ( konstitusyen).

Ku iya, Artikel 145 Konstitusyen Perintah Besai terang madahka pengulih orang nya dipadu nyadi Luyar Menua, iya nya seiku orang ke ulih nyadi akim Kort Perintah Besai.

Nengah Artikel 123 ku iya, orang nya enda tau enda orang ke asal ari menua tu empu (orang Malaysia), lalu 10 taun sebedau iya dipadu mangku pengawa nya, iya kala nyadi luyar ngarika orang alam pechara tauka kala nyadi kaban servis pengawa nyadi luyar sereta bisi kaul enggau undangundang.

“Konstitusyen terang madah pasal padu pangku pengawa. Nadai pemerat bukai kelimpah ari Artikel Konstitusyen baka nya.

“Nya alai, aku nadai meda penyelai ba penau tauka pengelandik Thomas nyadi orang ke ulih dipadu nyadi Luyar Menua Malaysia, lalu nyengkaum Perintah Besai, baka ke disadang ulih perintah PH,” ku iya madah ba siti penerang ditu, kemari.

Iya madah munyi nya lebuh nimbal penyarut sereta penanggul ke nyadi ba pekara bekait enggau pangku pengawa Thomas ke diasuh nganti Tan Sri Mohamed Apandi Ali.

Tiang madah, SUPP majak bepegai ba semengat sereta Konstitusyen Perintah Besai nyadi undangundang ke pengabis besai di menua tu.

Ku iya, SUPP pechaya Konstitusyen Perintah Besai enda ngenggaika bansa sereta pengarap bukai.

“Tang, Konstitusyen Perintah Besai kitai nyadi pemun ngagai komuniti ke datai ari mayuh macham pupu bansa sereta pengarap, komuniti ke ngembuan mayuh macham adat pesaka, demokratik sereta sekular.

“Nadai orang ke ulih ngelui agi ari Konstitusyen,” ku iya.