SUPP ngadang Petronas deka ngambu asil minyak enggau gis Sarawak
KUCHING: Parti Sa’ati Rayat Sarawak (SUPP) ngadang pengawa ke deka digaga Pakatan Harapan (PH) enti sida iya ngambi Putrajaya.
Presiden SUPP Datuk Dr. Sim Kui Hian madahka kebuah SUPP seruran ngangkat sereta meri penemu maya kimpin Pengawa Bepilih Besai ke-14 (PRU14) tu tadi bekait enggau pemerat ngenegapka Sarawak ke Kuat (building a Stronger Sarawak) agi napi penanggul ti deka nyadi jemah ila.
“SUPP mengkang tegut bediri madahka iya nya tanah nyengkaum rampa menua (minyak enggau gis) ke ditemu ba baruh tasik enggau pantai di tasik Sarawak (Sarawak Continental Shelf) diempu ulih Sarawak, ke nyadi menua ke bisi hak ngempu lalu ukai Petronas,” ku Dr. Sim.
Taja pia ku iya, berindik ari ‘Proclamation of Emergency’ dalam taun 1969, hak minyak Sarawak diambi ulih Perintah Besai nengah ‘Petroleum Mining Act 1966’, The Continental Shelf Act 1966’ enggau ‘Petroleum Development Act 1974’ (PDA 1974).
“Taja pia, lebuh undangundang penusah ngenyit (emergency laws) diangkatka dalam taun 2012, enggau PDA 1974 dikemendarka, ke enda betanya dulu enggau Kunsil Nengeri Sarawak (DUN), orang ke bempu minyak enggau gis (enti nitih) pulai baru ngagai Sarawak,” ku iya.
Dr. Sim ti mega nyadi Menteri Opis Kandang Menua enggau Menteri Pengawa Berumah madahka SUPP besemaya deka ngetanka hak Sarawak datai ke pengujung iya, dataika hak sereta menua ke patut ngempu minyak enggau gis nya.
“Laban kami udah diberi mandat nyadi sebagi ari Perintah menua Sarawak dalam PRN16, kami enda balang semaya. Kami enda ngemendarka kompeni ke bisi kaul enggau Perintah ngambi hak nya, ngambi pengaya sereta pengeraja kami dibai pansut ngagai Semenanjung baru.
“Kami mega ngarapka semua rayat Sarawak bediri sama tegut mantah kelim ke digaga ulih Petronas, tang meri sukung penuh ngagai Perintah Menua Sarawak ngetanka hak kami dalam pemisi minyak asal ari menua tu,” ku iya.
Iya madah munyi nya lebuh nimbal pengawa Petronas ke meri nutis ngagai Perintah Menua Sarawak ke deka dibantaika nengah Artikel 4( 4) ari Konstitusyen Perintah Besai deka dipechara di Putrajaya kena 12 Jun tu ila.
Ba siti penerang ari Perintah Menua kemari, Menteri Muda (betatika pekara Undang-undang, Kaul entara Perintah Menua enggau Besai, sereta Menteri Muda ke ngemataka Projek Menua tu) Sharifah Hasidah Sayeed Aman Ghazali ensanus netapka Sarawak Attorney General (SAG) bisi nerima nutis ari Pengerijista Kort Perintah Besai.
“Opis SAG bisi nerima nutis ari Pengerijista Kort Perintah Besai kena 4 Jun tu tadi...iya nya Perintah Menua Sarawak digaga sebagi ari raban dalam pechara ke digaga ulih Petronas, bekait enggau Petroliam Nasional Berhad ngelaban Perintah Menua Sarawak,” ku Sharifah Hasidah.